Faf
കഴിഞ്ഞ സീസണിലെ പ്ലേ ഓഫ് മത്സരത്തിൽ ബംഗളൂരുവിനെതിരായുള്ള മത്സരത്തിനിടയിൽ റഫറിയുടെ തെറ്റായ തീരുമാനത്തിൽ പ്രതിഷേധിച്ച് കേരള ബ്ലാസ്റ്റേഴ്സ് കളിക്കളം വിട്ട സംഭവത്തിൽ ബ്ലാസ്റ്റേഴ്സിന് വീണ്ടും തിരിച്ചടി. സംഭവത്തിൽ ബ്ലാസ്റ്റേഴ്സ് കളിക്കളം വിട്ടതിനെ തുടർന്ന് എ ഐ എഫ് എഫിന്റെ അച്ചടക്ക സമിതി നേരത്തെ ബ്ലാസ്റ്റേഴ്സിനും പരിശീലകൻ ഇവാൻ വുകമാനോവിച്ചിനും പിഴയും മത്സരവിലക്കും ഏർപ്പെടുത്തിയിരുന്നു.
ക്ലബ്ബിന് നാല് കോടി രൂപയും ഇവാന് 5 ലക്ഷം രൂപയുമാണ് പിഴ വിധിച്ചത്. കൂടാതെ വുകമാനോവിച്ചിന് പത്തു മത്സരങ്ങളിൽ വിലക്കും എ ഐ എഫ് എഫ് ഏർപ്പെടുത്തിയിരുന്നു.
എ ഐ എഫ് എഫിന്റെ ഈ നടപടിക്ക് പിന്നാലെ കേരള ബ്ലാസ്റ്റേഴ്സ് ഇതിനെതിരെ ഒരു അപ്പീൽ നൽകിയിരുന്നു. പിഴത്തുക കുറയ്ക്കാനും പരിശീലകനെതിരെ ഏർപ്പെടുത്തിയ മത്സരവിലക്ക് കുറയ്ക്കാനുമായിരുന്നു കേരള ബ്ലാസ്റ്റേഴ്സ് അപ്പീൽ നൽകിയത്.
എന്നാൽ കേരള ബ്ലാസ്റ്റേഴ്സ് നൽകിയ ഈ അപ്പീലും എ ഐ എഫ് എഫ് തള്ളിയിരിക്കുകയാണ്. എ ഐ എഫ്എഫ് ഈ അപ്പീൽ തള്ളിയതോടുകൂടി കേരള ബ്ലാസ്റ്റേഴ്സിന്റെ പിഴയോ പരിശീലകന്റെ മത്സരവിലക്കുകളോ ഒന്നും കുറയില്ല.
കേരള ബ്ലാസ്റ്റേഴ്സിന്റെ അപ്പീൽ എ ഐ എഫ് എഫ് തള്ളിയതോടെ ഇനി ഒരിക്കൽ കൂടി അപ്പീലിന് പോകാൻ ബ്ലാസ്റ്റേഴ്സിനാവില്ല. അതിനാൽ ആദ്യഘട്ടത്തിൽ പ്രഖ്യാപിച്ച പിഴ തുകയും ഇവാന് ഏർപ്പെടുത്തിയ മത്സരവിലക്കും ഇനിയും നിലനിൽക്കും.
അടുത്ത സീസണിൽ വലിയ പ്രതീക്ഷകളോടെ കളിയാരംഭിക്കാനിരിക്കുന്ന കേരള ബ്ലാസ്റ്റേഴ്സിനെ സംബന്ധിച്ച് വലിയ തിരിച്ചടിയാണ് ഈ നീക്കം. പരിശീലകൻ ഇവാൻ വുകമാനോവിച്ചിൻറെ മത്സരവിലക്ക് ബ്ലാസ്റ്റേഴ്സിനെ അടുത്ത സീസൺ തുടക്കത്തിൽ മോശം രീതിയിൽ ബാധിക്കും.
