CR7-ന്റെ റയലിനെയും മെസ്സിയുടെ ബാഴ്സയെയും മിസ് ചെയ്യുന്നവരുണ്ടോ? സൂപ്പർ താരങ്ങൾ ക്ലബ്ബ്‌ വിട്ടപ്പോൾ സംഭവിച്ചത്…

ലോകഫുട്ബോളിന്റെ ചരിത്രത്തിലെ ഏറ്റവും മികച്ച ഒരു യുഗമാണ് ഇപ്പോൾ കടന്നു പോകുന്നത്, ക്രിസ്റ്റ്യാനോ റൊണാൾഡോ – ലയണൽ മെസ്സി പോരാട്ടം കണ്ട ഈയൊരു മെസ്സി-റൊണാൾഡോ യുഗം ഏതാണ്ട് അവസാനിക്കാനായായി, നിലവിൽ 2023 വരെയാണ് ഇരുതാരങ്ങൾക്കും അവരുടെ ക്ലബ്ബുമായി കരാർ അവശേഷിക്കുന്നത്.

റയൽ മാഡ്രിഡ്‌ vs ബാഴ്സലോണ എൽ-ക്ലാസ്സികോ മത്സരങ്ങളെ, ഫുട്ബോളിനെ തന്നെ ഇത്രയേറെ സുന്ദരമാക്കിയ പോരാട്ട വീര്യമാണ് കഴിഞ്ഞ ഒന്നര പതിറ്റാണ്ട് കാലത്തോളം ക്രിസ്റ്റ്യാനോ റൊണാൾഡോ, ലയണൽ മെസ്സി എന്നീ താരങ്ങൾ കാഴ്ച വെച്ചത്.

റയൽ മാഡ്രിഡ്‌, ബാഴ്സലോണ എന്നീ ക്ലബ്ബുകൾക്ക് വേണ്ടി മെസ്സിയും റൊണാൾഡോയും കളിക്കുന്ന ആ കാലം തന്നെയാണ് ഫുട്ബോൾ ആരാധകരുടെ മനസ്സുകളിൽ ഇന്നും ഏറ്റവും മനോഹരമായ ഓർമ്മകൾ സമ്മാനിക്കുന്ന സമയമായി തങ്ങിനിൽക്കുന്നത്.

2009-2018 വരെ റയലിൽ കളിച്ച ക്രിസ്റ്റ്യാനോ റൊണാൾഡോ, താൻ നേടിയ 5 UCL കിരീടങ്ങളിൽ 4 എണ്ണവും റയൽ മാഡ്രിഡിനൊപ്പമായിരുന്നു. 2004-2021 വരെ ബാഴ്സയിൽ കളിച്ച മെസ്സി തന്റെ കരിയറിൽ നേടിയ 4 UCL കിരീടങ്ങളും ബാഴ്സലോണക്കൊപ്പമായിരുന്നു.

എന്നാൽ, 2018-ൽ റൊണാൾഡോയും, 2021-ൽ മെസ്സിയും അവരുടെ പ്രിയക്ലബ്ബുകളെ വേർപിരിഞ്ഞത് റയൽ മാഡ്രിഡ്‌, ബാഴ്സലോണ എന്നീ ക്ലബ്ബുകളുടെ പ്രകടനത്തെ വളരെയധികം ബാധിച്ചിട്ടുണ്ട്. റയൽ മാഡ്രിഡിന്റെ കാര്യത്തിലാണെങ്കിൽ, അവർ പഴയ പ്രതാഭത്തിലേക്ക് മടങ്ങി വരുന്നുണ്ട്, എന്നാൽ ബാഴ്സയുടെ അവസ്ഥ വളരെ മോശമാണ്…

2018-ൽ ക്രിസ്റ്റ്യാനോ റൊണാൾഡോ ക്ലബ്ബ്‌ വിട്ടതിനു ശേഷം റയൽ മാഡ്രിഡ്‌ യുവേഫ ചാമ്പ്യൻസ് ലീഗിലെ എല്ലാ സീസണിലും റൗണ്ട് ഓഫ് 16-ൽ ഇടം നേടിയിരുന്നുവെങ്കിലും കിരീടം ഉയർത്താൻ മാഡ്രിഡുകാർക്ക് കഴിഞ്ഞിട്ടില്ല, ക്രിസ്റ്റ്യാനോ റൊണാൾഡോക്കൊപ്പം റയൽ മാഡ്രിഡ്‌ അവസാനമായി കളിച്ച 5 സീസണിൽ 4 തവണയും UCL കിരീടം സാന്റിയാഗോ ബെർണബുവിൽ എത്തിയിരുന്നു എന്നത് CR7-ന്റെ റയൽ മാഡ്രിഡ്‌ എന്താണെന്ന് കാണിച്ചുതരുന്നു.

2021-ൽ സൂപ്പർ താരം ലയണൽ മെസ്സി ക്ലബ്ബ്‌ വിട്ടതിനു ശേഷം ബാഴ്സലോണ ഈ സീസണിലെ ചാമ്പ്യൻസ് ലീഗിന്റെ ഗ്രൂപ്പ് റൗണ്ടിൽ പരാജയങ്ങൾ രുചിച്ചുകൊണ്ട് ചാമ്പ്യൻസ് ലീഗിൽ നിന്നും യൂറോപ്പ ലീഗിലേക്ക് നടന്നകലുന്ന കാഴ്ചക്കാണ് ലോകം സാക്ഷ്യം വഹിച്ചത്, മെസ്സി ക്ലബ്ബ് വിട്ടതോടെ ആരാധകർ പോലും കാണാൻ ആഗ്രഹിക്കാത്ത സംഭവങ്ങളാണ് ബാഴ്സയിൽ നടക്കുന്നത്.

എന്തായാലും, ക്രിസ്റ്റ്യാനോ റൊണാൾഡോ – ലയണൽ മെസ്സി യുഗം പോലെ ഫുട്ബോളിനെ ഇത്രയുമധികം മനോഹരമാക്കിയ മറ്റൊരു യുഗം പോലും ഫുട്ബോളിന്റെ ചരിത്രത്തിൽ ഉണ്ടാവില്ല. മെസ്സിയും റൊണാൾഡോയും റയൽ, ബാഴ്സ ക്ലബ്ബുകൾ വിട്ടതിനു ശേഷം സ്പാനിഷ് ഫുട്ബോളിന്റെ മാത്രമല്ല, ലോകഫുട്ബോളിന്റെ തന്നെ മനോഹാരിത നഷ്ടപെട്ടതു പോലെയാണ്…