നെയ്‌മറെ നയിച്ച ഐഎസ്എൽ താരം വീണ്ടും ഇന്ത്യയിലേക്ക് മടങ്ങിയെത്തുന്നു

ഗെഴ്സൺ വിയെറ എന്ന ബ്രസീലിയൻ താരത്തെ ഐഎസ്എൽ ആരാധകർ മറക്കാനിടയില്ല. 2016,2017-2018 സീസണിൽ മുംബൈ എഫ്സിയ്ക്ക് വേണ്ടി കളിച്ച താരമാണ് ഗെഴ്സൺ. അന്ന് മുംബൈയുടെ നട്ടെല്ല് കൂടിയായിരുന്നു ഈ ബ്രസീലിയൻ.

രണ്ട് സീസണുകളിൽ മുംബൈ സിറ്റിക്ക് വേണ്ടി കളിച്ച ഗെഴ്സൺ അടുത്ത സീസണിൽ എടികെയ്ക്ക് വേണ്ടി ബൂട്ട് കെട്ടുകയും ചെയ്തു. മുംബൈയ്ക്ക് വേണ്ടി 31 മത്സരങ്ങളിൽ 2 ഗോളും എടികെയ്ക്ക് വേണ്ടി 18 മത്സരങ്ങളിൽ നിന്ന് ഒരു ഗോളും താരം നേടിയിട്ടുണ്ട്.

2018-19 സീസണിൽ എടികെയ്ക്ക് ബൂട്ട്കെട്ടിയതാണ് താരം അവസാനമായി കളിച്ച ഇന്ത്യൻ ക്ലബ്‌. ഇപ്പോഴിതാ ഈ ബ്രസീലിയൻ വീണ്ടും ഇന്ത്യയിലേക്ക് മടങ്ങി വരികയാണ്.

ഐ ലീഗ് ക്ലബ്ബായ ട്രാവു എഫ്സിയാണ് ഈ 30 കാരനെ സ്വന്തമാക്കിയത്. ഈ സീസൺ മുതൽ ഐലീഗിൽ പ്രൊമോഷനുകൾ ഉള്ളതിനാൽ തന്നെ വലിയ സൈനിങ്ങുകളാണ് ഐ ലീഗ് ക്ലബ്ബുകൾ നടത്തുന്നത്. അതിന്റെ ഭാഗമായാണ് ഗെഴ്സൺ വിയെറയെ ട്രാവു എഫ്സി ടീമിലെത്തിച്ചത്.

2009 ലെ ഫിഫ അണ്ടർ 17 ലോകകപ്പിലെ ബ്രസീൽ ടീമിന്റെ നായകനായിരുന്നു ഗെഴ്സൺ. അന്ന് സാക്ഷാൽ നെയ്മറും കൂട്ടിഞ്ഞോയുമൊക്കെയായിരുന്നു അണ്ടർ 17 ലോകകപ്പിലെ ഗെഴ്സൺ വിയെറയുടെ സഹതാരങ്ങൾ.