ഭയപ്പെടുത്തി ഹൃദയം കീഴ്‌പ്പെടുത്തിയവൻ ഒരേയൊരു സ്പീഡ് ബോണ്ട്

എതിരാളികളെ കൊന്നു തള്ളി പോണ്ടിങ് എന്ന നായകനൊപ്പം ഓസീസ് ജൈത്രയാത്ര നടത്തിയൊരു കാലമുണ്ട് ക്രിക്കറ്റിൽ അവർക്കെതിരെ എതിരാളികൾ സ്വന്തമാക്കുന്ന സെഞ്ചുറികളും 5 വിക്കറ്റുകൾക്കും ആരാധകർ ഒരുപാട് മൂല്യമിട്ടൊരു കാലം.

ഷെയിൻ ബോണ്ടിന്റെ കരിയർ ഓർക്കുമ്പോൾ ആദ്യം ഓർമ്മകൾ നയിക്കുന്നത് ആ മഹാമേരുക്കൾക്കെതിരെ അയാൾ നടത്തിയ പോരാട്ടങ്ങളിലേക്കാണ് ,സ്വിങ്ങും വേഗതയും കൊണ്ട് അയാൾ ആ മഞ്ഞ കുപ്പായക്കാരെ കാറ്റിൽ പറത്തിയ എത്രെയെത്ര നിമിഷങ്ങൾ.

ഏകദിന കരിയറിൽ സ്വന്തമാക്കിയ 147 വിക്കറ്റുകളിൽ 44 ഉം ആ കാലത്തെ മികച്ചവർക്കെതിരെ ,മൂന്നാമനായിറങ്ങി ചരിത്രത്തിൽ സ്ഥാനം സ്വന്തമാക്കുന്ന ഓസീസിന്റെ ഇരട്ടച്ചങ്കനായ നായകനെ തന്റെ ആദ്യ 6 മത്സരങ്ങളിൽ പവലിയനിലേക്കയച്ച ഫാസ്റ്റ് ആൻഡ് ഫ്യൂരിയസ് ബോണ്ട് ,ടെസ്റ്റിലേയും ഏകദിനത്തിലെയും മോഹിപ്പിക്കുന്ന ആവറേജ്, അവിടെ അയാളെ തകർക്കാൻപരിക്കുകൾക്ക് മാത്രമേ സാധിക്കുമായിരുന്നുള്ളു.

ആ റോൾ പരിക്കുകൾ മനോഹരമാക്കിയപ്പോൾ നഷ്ടപെട്ടത് ഫാസ്റ്റ് ബൗളിങ്ങിന്റെ മനോഹാരിതയായിരുന്നു ആ അഴകുള്ള ക്ലീൻ ആക്ഷനിൽ നിന്ന് ഇരുപത്തി രണ്ടു വാരയിലേക്ക് പതിക്കുന്ന ബോളുകൾ കൂടുതൽ ആസ്വദിക്കാൻ സാധിക്കാഞ്ഞത് ഓരോ ക്രിക്കറ്റ് ആരാധകരുടേയും എക്കാലത്തെയും നഷ്ടങ്ങളായിരുന്നു.

മഞ്ഞകുപ്പായ തകർത്തെറിയുന്ന ബോണ്ട് എന്നും കാണാൻ ആഗ്രഹിച്ചിരുന്ന സൗന്ദര്യമായിരുന്നെങ്കിൽ ഇന്ത്യക്കെതിരെ ഓടിയടുക്കുന്ന ആ രൂപം പേടിപ്പെടുത്തുന്ന ദൃശ്യങ്ങളായിരുന്നു അവിടെ 2003 വേൾഡ് കപ്പിൽ 146 എന്ന ചെറിയ ലക്ഷ്യത്തിലേക്ക് ബാറ്റേന്തുന്ന ഇന്ത്യയെ വീരുവിനെയും ഒരു അൺപ്ളെയബിൾ യോർക്കറിൽ ദാദയെയും മടക്കി അയാൾ ആഘോഷിച്ചപ്പോൾ ഭീതിയോടെ ആ ആക്രമണകാരിയെ നോക്കിയിരുന്ന ഓർമ്മകളുണ്ട്.

2005 ലെ വീഡിയോകോൺ കപ്പിൽ ഗാംഗുലിക്കെതിരെ അയാൾ വർഷിക്കുന്ന ആ ആദ്യ ഓവറുകളോളം ഭീതിപ്പെടുത്തി ബോളുകൾ ഈ ഓര്മ്മകളിലില്ല ,തന്റെ 7 ഓവർ സ്പെല്ലിൽ 5 ബാറ്റ്‌സ്മാൻമാരെ പുറത്തേക്കാനയിച്ചു ബോണ്ട് ഫാസ്റ്റ് ബോളിങ്ങിന്റെ വന്യതയും മനോഹാരിതയും പ്രദർശിപ്പിച്ച ആ ദിനങ്ങൾ.

ഓർമ്മയിലേക്ക് വരുന്നത് ഒരിക്കലും മറക്കാനാവാത്ത ആ വേൾഡ് കപ്പിലെ സ്പെല്ലാണ് ,കിവികൾ തോല്കുമ്പോഴും ബോണ്ട് ജയിച്ച ആ ദിനമാണ്.

2003 വേൾഡ് കപ്പിലേ ഗ്രൂപ്പിലെ 7 മത്സരവും ജയിച്ചു അജയ്യരായി മുന്നേറുന്ന ആ ഓസീസ് പട.

അന്ന് സൂപ്പർസിക്സിൽ പോർട്ട് എലിസബെത്തിൽ കിവീസ് അവരെ നേരിടാനിറങ്ങുകയാണ്.

അവിടെ തന്റെ കരിയറിലുടനീളം ആ മഞ്ഞക്കുപ്പായക്കാരെ വിറപ്പിച്ച ബോണ്ട് ഒരു കൊടുങ്കാറ്റായി വീശുന്നതിനായിരുന്നു പിന്നീട് ക്രിക്കറ്റ് ലോകം സാക്ഷ്യം വഴിച്ചത്.

ഹെയ്ഡനെ മക്കല്ലത്തിന്റെ കൈകളിൽ എത്തിച്ചതിന്റെ ആഘാതം മാറും മുന്നേ ഒരു ഫുൾ ലെങ്ത് ഡെലിവെറിയിൽ ഗില്ലി വിക്കറ്റിന് മുന്നിൽ കുടുങ്ങുകയാണ് ..അടുത്തത് തന്റെ ചെറിയ കരിയറിൽ 7 തവണ വീഴ്ത്തിയ പോണ്ടിങ്ങിനെ സ്ലിപ്പിൽ ഫ്ലെമിങ്ങിന്റെ കൈകളിൽ എത്തിക്കുന്ന കാഴ്ച്ച ..പിന്നീട് മാർട്ടിനും ഹോഗ്ഗും ഹാർവിയുമൊക്കെ അയാൾക്ക് മുന്നിൽ കീഴടങ്ങുന്നുണ്ട്.

അവിടെ പലരുടെയും കാല്പാദം തകരുന്നുണ്ട് ,വിക്കറ്റുകൾ വായുവിൽ നൃത്തമാടുന്നുണ്ട് ….ഓസീസിന്റെ പേര് കേട്ട ആ ടോപ് ഓർഡറിനെ ഒറ്റക്കയാൾ കാറ്റിൽ പറത്തുകയാണ് ,അഗ്ഗ്രസ്സീവ് ഫാസ്റ്റ് ബൗളിങ്ങിന്റെ അങ്ങേ അറ്റം. അസാമാന്യ വേഗത്തോടൊപ്പം ലൈനും ലെങ്തും കാത്തു സൂക്ഷിച്ചു ആ മനോഹര ആക്ഷനിൽ പിറക്കുന്ന ഓരോ ബോളുകളും വിക്കറ്റുകൾ സമ്മാനിക്കുമെന്ന തോന്നൽ ജനിപ്പിച്ച ദിനം.

10 ഓവറിൽ വെറും 23 റൺസ് വഴങ്ങി അന്നയാൾ എറിഞെടുത്ത ആ 6 വിക്കറ്റുകൾ കിവികളെ സെമിയിലേക്ക് അടുപ്പിക്കുമെന്നുള്ള ചിന്തകൾ സമ്മാനിച്ച ആ നിമിഷം ,അവിടെ ബെവനും ബിക്കലും രക്ഷകരായപ്പോൾ ബോണ്ട് പുറത്തെടുത്ത ഹീറോയിസം കിവീസ് ബാറ്റ്‌സ്മാന്മാർക്ക് പുറത്തെടുക്കാൻ സാധിക്കാതെ വന്നപ്പോൾ വീണ്ടും ഓസീസ് ജയിച്ചു കയറുകയാണ്.

ആസ്വദിച്ച ആ ചെറിയ കാലങ്ങളിൽ ഇത്രത്തോളം ഹൃദയത്തിൽ കയറിയ വിദേശ മുഖങ്ങൾ കുറവായിരുന്നു ,അവിടെ ഫാസ്റ്ബൗളിങ്ങിന്റെ എക്കാലത്തെയും സൗന്ദര്യം തുളുമ്പിയ ബോണ്ടിങ്ങനെ എന്നും നിറഞ്ഞു നിൽക്കും.