Sanu
കേരള ബ്ലാസ്റ്റേഴ്സ് സീസണിലെ മൂന്നാമത്തെ ഇന്ത്യൻ സൈനിങ്ങായി ടീമിലെത്തിച്ച ബിദ്യസാഗർ സിങ് എന്ന 24 വയസുള്ള യുവ മുന്നേറ്റ നിര താരത്തിന്റെ സൈനിങ് വളരെയധികം പ്രതീക്ഷയോടെയാണ് കേരള ബ്ലാസ്റ്റേഴ്സ് ആരാധകർ കാണുന്നത്.
താരത്തിന്റെ മുൻകാല ചരിത്രമെടുത്താൽ 2020-2021 ഐ ലീഗിലെ ഏറ്റവും മികച്ച താരം, ഏറ്റവും മികച്ച ഗോൾസ്കോറർ എന്നീ മികച്ച നേട്ടങ്ങളെല്ലാം നമുക്ക് കാണാൻ കഴിയും.
2016-ൽ ഈസ്റ്റ്‌ ബംഗാളിന്റെ യൂത്ത് അക്കാദമിയിൽ കളി തുടങ്ങിയ താരം 2018-ൽ ഈസ്റ്റ്‌ ബംഗാൾ സീനിയർ ടീമിലൂടെ പ്രൊഫഷനൽ ഫുട്ബോളിൽ അരങ്ങേറ്റം കുറിച്ചു.
2020-ൽ ഐ ലീഗ് ടീമായ ട്രാവു എഫ്സിയിലെത്തിയ താരം 2020-2021 ഐ ലീഗ് സീസണിൽ 15 മത്സരങ്ങളിൽ നിന്ന് 12 ഗോളുകൾ നേടി ടീമിനെ ലീഗ് ടേബിളിൽ മൂന്നാമതെത്തിക്കുന്നതിൽ നിർണ്ണായക പങ്ക് വഹിച്ചു.
കൂടാതെ ഐ ലീഗ് സീസണിലെ ടീം ഓഫ് ഇലവനിൽ ഇടം നേടിയ താരം തന്നെയാണ് ആ സീസണിലെ മികച്ച താരം, മികച്ച ഗോൾസ്കോറർ അവാർഡുകൾ ഐ ലീഗിൽ വാരിക്കൂട്ടിയത്.
ഐ ലീഗിലെ മികച്ച പ്രകടനം ഇന്ത്യൻ സൂപ്പർ ലീഗ് ക്ലബ്ബായ ബാംഗ്ലൂരു എഫ്സിയിലെത്തിച്ചു, 11 മത്സരങ്ങളിൽ നിന്ന് 3 ഗോളുകൾ ബാംഗ്ലൂരു എഫ്സി ജേഴ്സിയിൽ നേടിയ ബിദ്യസാഗർ സിങ്ങിനെ ഒരു സീസൺ ലോൺ കരാറിലാണ് ബ്ലാസ്റ്റേഴ്സ് ടീമിലെടുത്തത്.
24-കാരനായ ബിദ്യസാഗർ സിങ്ങിന്റെ സാന്നിധ്യം കേരള ബ്ലാസ്റ്റേഴ്‌സിന്റെ ഗോൾസ്കോറിങ് കഴിവിനെ ഉയർത്തുന്നതാകുമെന്ന പ്രതീക്ഷയിലാണ് ആരാധകർ.
