Sanu
ഫ്രാൻസിലെ പാരിസിൽ വെച്ച് നടന്ന 2021 ബാലൻ ഡി ഓർ പുരസ്‌കാരദാന ചടങ്ങിൽ, തന്റെ കരിയറിലെ ഏഴാമത്തെ ബാലൻ ഡി ഓർ പുരസ്‌കാരമാണ് PSG-യുടെ അർജന്റീന നായകനായ ലിയോ മെസ്സി ഏറ്റുവാങ്ങിയത്. ഫ്രാൻസ് ഫുട്ബോൾ നൽകുന്ന ബാലൻ ഡി ഓർ ആദ്യമായാണ് ഒരു PSG താരം സ്വന്തമാക്കുന്നത്.
2021 ബാലൻ ഡി ഓർ നേടിയ ലിയോ മെസ്സിയെയും, 2021-ലെ മികച്ച ഗോൾകീപ്പർക്കുള്ള യാഷിൻ ട്രോഫി സ്വന്തമാക്കിയ PSG യുടെ ഇറ്റാലിയൻ ഗോൾ കീപ്പറായ ജിയാൻലൂഗി ഡോണരുമ്മയെയും വാനോളം പ്രശംസിച്ചിരിക്കുകയാണ് PSG പ്രസിഡന്റായ നാസർ അൽ ഖലീഫി.
“ഞാൻ ലിയോയെ ഊഷ്മളമായി അഭിനന്ദിക്കാൻ ആഗ്രഹിക്കുന്നു. ഞങ്ങളുടെ കളിക്കാരിലൊരാൾ ഏറ്റവും അഭിമാനകരവും മോഹിപ്പിക്കുന്നതുമായ നേട്ടം ( ബാലൻ ഡി ഓർ പുരസ്‌കാരം) നേടിയത് ക്ലബ്ബിന് വലിയ അഭിമാനമാണ്. “
“ലിയോ, അദ്ദേഹത്തെ തന്നെ ഫുട്ബോൾ ചരിത്രത്തിൽ കുറച്ചുകൂടി കൂടുതൽ അടയാളപ്പെടുത്തി. ലോകമെമ്പാടുമുള്ള ഞങ്ങളുടെ എല്ലാ പിന്തുണക്കാരും എന്ന നിലയിൽ, ലോകത്തിലെ എക്കാലത്തെയും മികച്ച കളിക്കാരിൽ ഒരാൾ ചുവപ്പ്, നീല ജേഴ്‌സിയിൽ കളിക്കുന്നത് കാണുന്നതിൽ ഞങ്ങൾക്ക് സന്തോഷമുണ്ട്.” – എന്നാണ് PSG പ്രസിഡന്റ്‌ പറഞ്ഞത്.
മികച്ച ഗോൾ കീപ്പർക്ക് നൽകുന്ന യാഷിൻ ട്രോഫി നേടിയത് PSG യുടെ ഇറ്റാലിയൻ ഗോൾ ഗീപ്പറായ ജിയാൻലൂഗി ഡോണരുമ്മയാണ്. ഇറ്റലിക്കൊപ്പം 2020 യൂറോ കിരീടം നേടിയതും ഗോൾ പോസ്റ്റിനു മുന്നിൽ ഈ വർഷം നടത്തിയ മികച്ച പ്രകടനവും, 2021-ലെ യാഷിൻ ട്രോഫി ജിയാൻലൂഗി ഡോണരുമ്മക്ക് ലഭിക്കുന്നതിൽ നിർണായക നേട്ടങ്ങളായിരുന്നു.
“ജിയാൻലൂഗി ഡോണരുമ്മ, യാഷിൻ ട്രോഫി നേടിയതിൽ ഞങ്ങൾക്ക് അഭിമാനമുണ്ട്. 22-ാം വയസ്സിൽ ഈ ട്രോഫി ഉയർത്തുന്നത് അസാധാരണമായ ഒരു നേട്ടമാണ്, വരും സീസണുകളിൽ പാരീസ് സെന്റ് ജെർമെയ്ന്റെ പദ്ധതികളുടെ വിജയത്തിന് അദ്ദേഹം വളരെയധികം സംഭാവന നൽകുമെന്ന് ഞങ്ങൾക്ക് ഉറപ്പുണ്ട്.” – നാസർ അൽ ഖലീഫി പറഞ്ഞു.
