കേരള ബ്ലാസ്റ്റേഴ്സ് എഫ് സി ചരിത്രത്തില് ഏറ്റവും കൂടുതല് മത്സരങ്ങളില് മുഖ്യ പരിശീലകന് എന്ന റെക്കോർഡാണ് ഇവാന് വുകോമനോവിച്ച് സ്വന്തമാക്കിയത്.
ഈസ്റ്റ് ബംഗാള് ക്ലബ്ബിന് എതിരായ എവേ പോരാട്ടത്തില് ആയിരുന്നു അത്. സാള്ട്ട് ലേക്ക് സ്റ്റേഡിയത്തില് നടന്ന മത്സരത്തില് ഈസ്റ്റ് ബംഗാള് 1 – 0 ന് ജയിച്ചതോടെ ഇവാന് വുകോമനോവിച്ചിന്റെ റെക്കോർഡ് മധുരതരമായില്ല എന്നതും വാസ്തവം.
ഈസ്റ്റ് ബംഗാളിന് എതിരായത് ഇവാന് വുകോമനോവിച്ചിന്റെ ശിക്ഷണത്തില് കേരള ബ്ലാസ്റ്റേഴ്സ് എഫ് സി യുടെ 42 -ാം മത്സരം ആയിരുന്നു. ഇംഗ്ലീഷ് മുന് ഗോളി ഡേവിഡ് ജയിംസിന്റെ പേരില് ഉണ്ടായിരുന്ന 41 മത്സരങ്ങളില് കേരള ബ്ലാസ്റ്റേഴ്സ് എഫ് സി പരിശീലകന് എന്ന റെക്കോർഡാണ് ഇവാന് വുകോമനോവിച്ച് തകര്ത്തത്. 2014, 2018 എന്നിങ്ങനെ രണ്ട് ടേമില് ആയിരുന്നു ഡേവിഡ് ജയിംസ് കേരള ബ്ലാസ്റ്റേഴ്സ് എഫ് സി യുടെ 41 മത്സരങ്ങളില് മുഖ്യ പരിശീലക വേഷം അണിഞ്ഞത്.
കേരള ബ്ലാസ്റ്റേഴ്സ് എഫ് സിയെ ഏറ്റവും കൂടുതല് ജയത്തില് എത്തിച്ചത് ( 20 ജയം ) , ഏറ്റവും കൂടുതല് വിജയ ശതമാനം ഉള്ള കേരള ബ്ലാസ്റ്റേഴ്സ് പരിശീലകന് ( 47.62 ശതമാനം ) എന്നീ രണ്ട് പ്രധാന റെക്കോർഡുകളും ഇവാന് വുകോമനോവിച്ചിന്റെ പേരില് ആണ്. 2022 ഏപ്രില് നാലിന് ആണ് കേരള ബ്ലാസ്റ്റേഴ്സ് എഫ് സി യുമായി ഇവാന് വുകോമനോവിച്ച് 2025 വരെ കരാര് ദീര്ഘിപ്പിച്ചത്.
2022 – 2023 സീസണില് പ്ലേ ഓഫ് ലക്ഷ്യമാക്കി നീങ്ങുകയാണ് കേരള ബ്ലാസ്റ്റേഴ്സ് എഫ് സി. 16 മത്സരങ്ങളില് നിന്ന് 28 പോയിന്റുമായി കേരള ബ്ലാസ്റ്റേഴ്സ് എഫ് സി നിലവില് മൂന്നാം സ്ഥാനത്ത് ആണ്. പോയിന്റ് ടേബിളില് ആദ്യ ആറ് സ്ഥാനക്കാര്ക്ക് പ്ലേ ഓഫ് യോഗ്യത ലഭിക്കും.