കഴിഞ്ഞ സമ്മർ ട്രാൻസ്ഫർ വിൻഡോയിൽ സഹൽ ബ്ലാസ്റ്റേഴ്സ് വിട്ടത്തോടെ താരത്തിന്റെ അഭാവത്തിൽ നിലവിൽ ബ്ലാസ്റ്റേഴ്സിന്റെ മധ്യനിര ഭരിക്കുന്നത് യുവ മലയാളി താരമായ വിപിൻ മോഹൻ തന്നെയാണെന്ന് പറയണം. ഈ സീസണിൽ പരിക്ക് മൂലം താരത്തിന് കുറച്ച് മത്സരങ്ങൾ നഷ്ടപെട്ടെങ്കിലും ബാക്കിയുള്ള മത്സരങ്ങളിൽ താരം തകർപ്പൻ പ്രകടനമാണ് ബ്ലാസ്റ്റേഴ്സിനായി കാഴ്ച്ചവെച്ചത്.
അങ്ങനെയിരിക്കെയാണ് കഴിഞ്ഞ ദിവസം വന്ന റിപ്പോർട്ടുകൾ പ്രകാരം താരത്തിന്റെ ബ്ലാസ്റ്റേഴ്സുമായുള്ള കരാർ ഈ സീസൺ അവസാനത്തോടെ അവസാനിക്കുമെന്നും, അതുകൊണ്ട് തന്നെ താരത്തെ സ്വന്തമാക്കാനായി മുംബൈ, ഈസ്റ്റ് ബംഗാൾ, ബംഗളുരു തുടങ്ങി വമ്പന്മാർ രംഗത്തുണ്ട് പറഞ്ഞു റിപ്പോർട്ടുകൾ വന്നത്.
എന്നാൽ താരത്തിന്റെ കരാർ ഈ സീസൺ അവസാനത്തോടെ അവസാനിക്കില്ല എന്നതാണ് സത്യാവസ്ഥ. താരത്തിന് നിലവിൽ ബ്ലാസ്റ്റേഴ്സുമായി 2026 വരെ കരാറുണ്ട്. അതുകൊണ്ട് തന്നെ ഈ പ്രചരിച്ച വാർത്തകൾ വ്യാജമാവാനാണ് സാധ്യത.
ഇനി അഥവാ ഈ വാർത്തകൾ സത്യമാണേൽ ബ്ലാസ്റ്റേഴ്സ് ചോദിക്കുന്ന തുക എതിരാളികൾക്ക് നൽകേണ്ടി വരും. പക്ഷെ ബ്ലാസ്റ്റേഴ്സ് താരത്തെ വിട്ടുകളയുകയാണേൽ അത് വെറും മണ്ടത്തരമാണെന്ന് മാത്രമേ പറയാൻ പറ്റുള്ളൂ. എന്തിരുന്നാലും താരവുമായി ബന്ധപ്പെട്ട് കൂടുതൽ വാർത്തകൾ വരും ദിവസങ്ങളിൽ പുറത്ത് വരുന്നതായിരിക്കും.