കേരള ബ്ലാസ്റ്റേഴ്സ് എഫ്സിയുടെ ഈ സീസണിലെ മികച്ച താരത്തിനുള്ള ഫാൻസ് ദി ബെസ്റ്റ് പ്ലയെർ ഓഫ് ദി സീസൺ അവാർഡ് നേടിയത് ഉറുഗായ് താരമായ അഡ്രിയാൻ ലൂണയായിരുന്നു.
ഇവാൻ കലിയൂഷ്നി, രാഹുൽ കെപി, ദിമിത്രിയോസ് ഡയമന്റാകോസ് തുടങ്ങിയ താരങ്ങളെ മറികടന്നാണ് ഏകദേശം 68%ഫാൻസ് വോട്ടിലൂടെ ലൂണ പുരസ്കാരം സ്വന്തമാക്കിയത്.
ഫാൻസ് വോട്ടിങ്ങിലൂടെ പുരസ്കാരം സ്വന്തമാക്കിയ അഡ്രിയാൻ ലൂണ ആരാധകർക്ക് നന്ദി പറഞ്ഞുകൊണ്ടും, താൻ മാത്രമല്ല ഈ ടീം മുഴുവൻ മികച്ച താരങ്ങളാണെന്നും പറഞ്ഞ് രംഗത്തെത്തി.
“എനിക്ക് വോട്ട് നൽകിയ എല്ലാവർക്കും വളരെയധികം നന്ദി. ഞാൻ മാത്രമല്ല ഈ ടീം മുഴുവനും സീസണിലെ മികച്ച താരങ്ങളാണ്. വീണ്ടും വളരെയധികം നന്ദി, നമുക്ക് ഇനിയും സ്വയം വിശ്വസിച്ചുകൊണ്ട് മുന്നേറാനുണ്ട്.” – അഡ്രിയാൻ ലൂണ പറഞ്ഞു.
ഇന്ത്യൻ സൂപ്പർ ലീഗിൽ നിന്നും പുറത്തായെങ്കിലും ഏപ്രിൽ മാസത്തിൽ കേരളത്തിൽ വെച്ച് നടക്കുന്ന സൂപ്പർ കപ്പ് ടൂർണമെന്റിൽ ഏറെ പ്രതീക്ഷകളുമായാണ് കേരള ബ്ലാസ്റ്റേഴ്സ് ഇറങ്ങുന്നത്.