ഇന്ത്യൻ സൂപ്പർ ലീഗ് അടുത്ത സീസണിലേക്ക് വേണ്ടി ഓരോ ടീമുകളും തയ്യാറെടുപ്പുകൾ ആരംഭിച്ചപ്പോൾ ജൂൺ മുതൽ ആരംഭിക്കുന്ന ട്രാൻസ്ഫർ മാർക്കറ്റിലും നിരവധി ട്രാൻസ്ഫർ നീക്കങ്ങളാണ് നടക്കുന്നത്.
അടുത്ത സീസണിലേക്ക് വേണ്ടി കേരള ബ്ലാസ്റ്റേഴ്സ് എഫ് സി തങ്ങളുടെ താരങ്ങളുമായി അണിഞ്ഞൊരുങ്ങുമ്പോൾ അവസാന സീസണിൽ നിന്നും വളരെയധികം വ്യത്യസ്തമായാണ് ഈ സീസണിനെ വരവേൽക്കുന്നത്.
പുതിയ പരിശീലകനും നിരവധി പുതിയ താരങ്ങളുമായാണ് ബ്ലാസ്റ്റേഴ്സ് ഒരുങ്ങുക. സെർബിയൻ തന്ത്രഞ്ജൻ ഇവാൻ വുകമനോവിചിനെ കൂടാതെ നിരവധി ഫോറിൻ താരങ്ങളും ബ്ലാസ്റ്റേഴ്സ് വിട്ടു.
ഗോൾഡൻ ബൂട്ട് ജേതാവ് ദിമിത്രിയോസ്, ഡൈസുകി സകായ്, മാർക്കോ ലെസ്കോവിച് എന്നിവർ ടീമിനോട് വിട പറഞ്ഞപ്പോൾ പെപ്ര, മിലോസ് എന്നിവരുടെ ഭാവിയും ഉറപ്പിക്കാനായിട്ടില്ല.
നിലവിൽ നായകൻ അഡ്രിയാൻ ലൂണ പുതിയ കരാർ സൈൻ ചെയ്തതോടെ വിദേശതാരമായി ലൂണയുടെ സാന്നിധ്യം അടുത്ത സീസണിൽ ഉറപ്പിക്കാം. പുതിയ പരിശീലകൻ വന്നതോടെ ഇനി പുതിയ മുഖങ്ങളായിരിക്കും ബ്ലാസ്റ്റേഴ്സ് ജേഴ്സിയിൽ ഫോറിൻ താരങ്ങളുടെ കാര്യത്തിൽ ബ്ലാസ്റ്റേഴ്സ് ആരാധകർക്ക് കാണാനാവുക.
നിലവിൽ അഡ്രിയാൻ ലൂണ അല്ലാതെ മറ്റു വിദേശ താരങ്ങളുടെ കാര്യത്തിൽ ഉറപ്പ് പറയാനാവില്ല. എന്നാൽ ബ്ലാസ്റ്റേഴ്സിന്റെ പുതിയ സൈനിങ് മുൻ ഗോവ എഫ്സി താരമായ നോഹ് സദോയിയെ കൂടി ലൂണയുടെ കൂടെ അടുത്ത സീസണിൽ ഉറപ്പിക്കാനാവും.