Faf
കേരളത്തിലെ ടൂറിസ്റ്റ് ബസ്സുകളുമായി ബന്ധപ്പെട്ട് തുടങ്ങിയ വിവാദത്തിൽ അധികൃതരെത്തിയ പരിഹാരം ടൂറിസ്റ്റ് ബസ്സുകൾക്ക് നിലവിലുള്ള നിറം മാറ്റി വെള്ളനിറം നൽകുക എന്നതായിരുന്നു. വെള്ളം നിറം നൽകിയാൽ അപകടങ്ങൾ ഇല്ലാതാവുമോ എന്ന ചോദ്യം പൊതുജനങ്ങളിൽ നിന്ന് ഉയരുന്ന സാഹചര്യത്തിലാണ് കേരളാ ബ്ലാസ്റ്റേഴ്‌സിന്റെ ബസ്സിനെതിരെയും എംവിഡി നടപടിക്കൊരുങ്ങുന്നത്.
ബ്ലാസ്റ്റേഴ്‌സിന്റെ ബസ്സിൽ നടത്തിയ ലാമിനേഷനുകൾക്കെതിരെ കഴിഞ്ഞ ശനിയാഴ്ച എംവിഡി അധികൃതർ നോട്ടീസ് നൽകിയിരുന്നു. എന്നാൽ നോട്ടീസ് നൽകിയിട്ടും ബ്ലാസ്റ്റേഴ്‌സ് ബസ്സിന്റെ കാര്യത്തിൽ മാറ്റങ്ങൾ കൊണ്ട് വന്നില്ലെന്നും ഇനിയും അനധികൃതമായി ബസ്സ്‌ ഓടിച്ചാൽ ബസ്സ്‌ പിടിച്ചെടുക്കുമെന്നും അധികൃതർ ബ്ലാസ്റ്റേഴ്‌സിന് മുന്നറിയിപ്പ് നൽകിയതായും റിപ്പോർട്ടുകളുണ്ട്.
അതെ സമയം, ബസ്സിന്റെ വിഷയവുമായി ബന്ധപ്പെട്ട് ബ്ലാസ്റ്റേഴ്‌സ് ഇതുവരെ ഔദ്യോഗിക പ്രതികരണം നടത്തിയിട്ടില്ല.
എന്നാൽ ഈ വിഷയവുമായി ബന്ധപ്പെട്ട് നിയമപരമായി മുന്നോട്ട് പോകാൻ ബ്ലാസ്റ്റേഴ്‌സ് ഒരുങ്ങുന്നതായും സൂചനകളുണ്ട്. ഐഎസ്എല്ലിൽ മറ്റ്‌ ടീമുകൾകളെല്ലാം മികച്ച ബസ്സുകളിൽ യാത്ര ചെയ്യുമ്പോൾ ബ്ലാസ്റ്റേഴ്‌സ് മാത്രം വെള്ളം നിറം നൽകിയ ബസ്സിൽ പോകേണ്ടി വരുന്ന അവസ്ഥ ഒഴിവാക്കാനായി ബ്ലാസ്റ്റേഴ്‌സ് അധികൃതർ ബന്ധപ്പെട്ട ഉദ്യോഗസ്ഥരുമായി ചർച്ചകൾ നടത്താനുള്ള സാധ്യതകളും കാണുന്നുണ്ട്.
അതെ സമയം, ഹൈക്കോടതിയുടെ ഉത്തരവാണ് ബസ്സുകളിൽ ഇത്തരം ലാമിനേഷനുകൾ പാടില്ല എന്നതും ആ ഉത്തരവ് മാത്രമാണ് ഞങ്ങൾ നടത്തുന്നതെന്നും ഉദ്യോഗസ്ഥരെ ഉദ്ധരിച്ച് മാധ്യമങ്ങൾ റിപ്പോർട്ട് ചെയ്യുന്നുണ്ട്.
