ലോക ക്രിക്കറ്റിൽ പരമ്പരാഗത ശക്തികൾക്കപ്പുറം, ചെറിയ രാജ്യങ്ങളും തങ്ങളുടെ സാന്നിധ്യമറിയിച്ച് മുന്നേറുകയാണ്. സമീപകാലത്ത് ടി20 ഫോർമാറ്റിൽ നടത്തിയ മികച്ച പ്രകടനങ്ങളിലൂടെ ഈ കുഞ്ഞൻ ടീമുകൾ ക്രിക്കറ്റ് ലോകത്ത് ശ്രദ്ധ നേടുകയാണ്. ഇത് ആഗോളതലത്തിൽ ക്രിക്കറ്റിന്റെ വളർച്ചയെയാണ് സൂചിപ്പിക്കുന്നത്.
ഈ നിരയിൽ ഏറ്റവും പുതിയതായി ശ്രദ്ധ നേടിയ രാജ്യമാണ് ഇറ്റലി. 2026-ലെ ടി20 ലോകകപ്പിന് യോഗ്യത നേടിയ അവർ തങ്ങളുടെ ക്രിക്കറ്റ് ചരിത്രത്തിലെ വലിയൊരു നാഴികക്കല്ലാണ് പിന്നിട്ടത്. കരുത്തരായ സ്കോട്ട്ലൻഡും നെതർലൻഡ്സും ഉൾപ്പെട്ട ഗ്രൂപ്പിൽ നിന്ന് യോഗ്യത നേടിയത് അവരുടെ കഴിവിന്റെ തെളിവാണ്. ആദ്യമായാണ് ഇറ്റലി ഒരു ഐസിസി ടൂർണമെന്റിൽ പങ്കെടുക്കുന്നത്.
ഇറ്റലിക്ക് ഒപ്പം യൂറോപ്യൻ യോഗ്യതാ റൗണ്ടിൽ തിളങ്ങിയ മറ്റൊരു ടീമാണ് ജേഴ്സി. റൺറേറ്റിന്റെ നേരിയ വ്യത്യാസത്തിൽ മാത്രമാണ് അവർക്ക് ലോകകപ്പ് യോഗ്യത നഷ്ടമായത്. 5 പോയിന്റുമായി ഇറ്റലിക്കൊപ്പമായിരുന്നെങ്കിലും, റൺറേറ്റ് കുറഞ്ഞതിനാൽ പുറത്തായി. സ്കോട്ട്ലൻഡിനെ തോൽപ്പിച്ച ജേഴ്സിയുടെ പ്രകടനം ഏറെ ശ്രദ്ധ നേടി. തദ്ദേശീയരായ കളിക്കാർ മാത്രം ഉൾപ്പെടുന്ന ടീമാണ് ജേഴ്സി എന്നതും ശ്രദ്ധേയമാണ്.
“കുഞ്ഞൻ” രാജ്യങ്ങളുടെ കൂട്ടത്തിൽ അന്താരാഷ്ട്ര തലത്തിൽ കൂടുതൽ പരിചയസമ്പത്തുള്ള ടീമാണ് നെതർലൻഡ്സ്. ഇറ്റലിയോടൊപ്പം 2026 ടി20 ലോകകപ്പിനും അവർ യോഗ്യത നേടിയിട്ടുണ്ട്. പലപ്പോഴും വലിയ ടീമുകൾക്ക് അപ്രതീക്ഷിത വെല്ലുവിളി ഉയർത്താനും അവരെ അട്ടിമറിക്കാനും നെതർലൻഡ്സിന് കഴിഞ്ഞിട്ടുണ്ട്. ഇവർക്കൊപ്പം ഏഷ്യൻ ക്രിക്കറ്റിൽ നിന്ന് ശ്രദ്ധേയമായ മുന്നേറ്റം നടത്തുന്ന രാജ്യമാണ് നേപ്പാൾ. ബാക്കി 3 രാജ്യങ്ങളെയും അപേക്ഷിച്ച് ക്രിക്കറ്റിനെ ഏറ്റവും സീരിയസായി കാണുന്ന രാജ്യമാണ് നേപ്പാൾ. അവരുടെ ജനപിന്തുണയും ഏറെ ശ്രദ്ധയമാണ്.
ഈ രാജ്യങ്ങളുടെ വളർച്ച ആഗോളതലത്തിൽ ക്രിക്കറ്റിന്റെ പ്രചാരണം വർദ്ധിപ്പിക്കുകയും ഭാവിയിൽ കൂടുതൽ ശക്തമായ മത്സരങ്ങൾക്ക് വഴിയൊരുക്കുകയും ചെയ്യുമെന്നത് ഉറപ്പാണ്. ഇത് ക്രിക്കറ്റ് എന്ന കായിക വിനോദത്തിന്റെ ഭാവിക്ക് ശുഭസൂചകമാണ്.