ഇന്ത്യൻ ഫുട്ബോൾ ആരാധകർക്ക് ആശങ്കയുണ്ടാക്കുന്ന ഒരു വാർത്തയാണ് ഇപ്പോൾ പുറത്തുവരുന്നത്. 2025-26 വർഷത്തെ ഇന്ത്യൻ സൂപ്പർ ലീഗ് (ISL) സീസൺ മുന്നോട്ട് കൊണ്ടുപോകാൻ കഴിയില്ലെന്ന് ലീഗ് അധികൃതർ ക്ലബ്ബുകളെയും എഐഎഫ്എഫിനെയും (AIFF) അറിയിച്ചിരിക്കുകയാണ്. നിലവിലെ മാസ്റ്റർ റൈറ്റ്സ് എഗ്രിമെന്റ് (MRA) കാലാവധിക്ക് ശേഷമുള്ള കരാർ ഘടനയെക്കുറിച്ച് വ്യക്തത ലഭിക്കാത്തതിനാലാണ് ഈ അപ്രതീക്ഷിത തീരുമാനം. മാർക്കസ് മെർഗുൽഹാവോയാണ് ഈ വിവരം റിപ്പോർട്ട് ചെയ്തത്.
ഫുട്ബോൾ സ്പോർട്സ് ഡെവലപ്മെന്റ് ലിമിറ്റഡും (FSDL) എഐഎഫ്എഫും തമ്മിലുള്ള MRA 2025 ഡിസംബറിൽ അവസാനിക്കും.പുതിയ കരാർ സംബന്ധിച്ച ചർച്ചകളിൽ വ്യക്തത വരാത്തതും സുപ്രീം കോടതിയിൽ നിലനിൽക്കുന്ന എഐഎഫ്എഫ് ഭരണഘടനയുമായി ബന്ധപ്പെട്ട കേസുകളുമാണ് ഈ പ്രതിസന്ധിക്ക് കാരണം.
ഈ അനിശ്ചിതത്വം ഐഎസ്എൽ ക്ലബ്ബുകളുടെ പ്രവർത്തനങ്ങളെ സാരമായി ബാധിച്ചിട്ടുണ്ട്. പുതിയ കളിക്കാരെ സൈൻ ചെയ്യുന്നതിനും പ്രീ-സീസൺ പരിശീലനം ആരംഭിക്കുന്നതിനും പല ക്ലബ്ബുകളും മടിച്ചുനിൽക്കുകയാണ്. സ്പോൺസർഷിപ്പ് ഡീലുകളും വിദേശ സൈനിംഗുകളും അവതാളത്തിലായി. ഐഎസ്എൽ സീസൺ വൈകുകയോ ചുരുക്കുകയോ അല്ലെങ്കിൽ ഒരു വർഷം പൂർണ്ണമായും ഇല്ലാതാവുകയോ ചെയ്യുമോ എന്ന ആശങ്കയിലാണ് ക്ലബ്ബ് ഉടമകൾ.
ഇന്ത്യൻ ഫുട്ബോൾ കലണ്ടറിൽ 2025-26 സീസണിലെ ഐഎസ്എല്ലിനെക്കുറിച്ച് യാതൊരു പരാമർശവും ഇല്ലാത്തത് ആശങ്ക വർദ്ധിപ്പിക്കുന്നുണ്ട്. സാധാരണയായി ഐഎസ്എൽ മത്സരക്രമം AIFF-മായി കൂടിയാലോചിച്ച ശേഷമാണ് പ്രഖ്യാപിക്കാറ്. ഈ തീരുമാനം ഇന്ത്യൻ ഫുട്ബോൾ ഇക്കോസിസ്റ്റത്തെ, പ്രത്യേകിച്ച് കളിക്കാർ, പരിശീലകർ, സ്റ്റാഫ് എന്നിവരെ വലിയ തോതിൽ ബാധിക്കും.
ഈ പ്രതിസന്ധി ഇന്ത്യൻ ഫുട്ബോളിന് ഒരു തിരിച്ചടിയാണ്. MRA സംബന്ധിച്ച വിഷയത്തിൽ എത്രയും പെട്ടെന്ന് വ്യക്തത വരികയും ലീഗ് സാധാരണ നിലയിലേക്ക് തിരിച്ചുവരികയും ചെയ്യേണ്ടത് ഇന്ത്യൻ ഫുട്ബോളിന്റെ ഭാവിക്കും വളർച്ചയ്ക്കും അത്യാവശ്യമാണ്.