ഇന്ത്യൻ ഫുട്ബോൾ ആരാധകർ ഏറെ കാത്തിരുന്ന ആവേശപ്പോരാട്ടങ്ങൾക്ക് ഇന്ന് പന്തുരുളും. ഇന്ത്യൻ സൂപ്പർ ലീഗിന്റെ (ഐഎസ്എൽ) 2025-26 സീസണിന് ഇന്ന് കൊൽക്കത്തയിൽ വർണ്ണാഭമായ തുടക്കമാവുകയാണ്.
ഉദ്ഘാടന മത്സരത്തിൽ നിലവിലെ കരുത്തരായ മോഹൻ ബഗാൻ സൂപ്പർ ജയന്റ്സും ആരാധകരുടെ പ്രിയപ്പെട്ട ടീമായ കേരളാ ബ്ലാസ്റ്റേഴ്സും തമ്മിലാണ് ഏറ്റുമുട്ടുന്നത്. വൈകുന്നേരം അഞ്ച് മണിക്ക് മോഹൻ ബഗാന്റെ തട്ടകമായ കൊൽക്കത്തയിലാണ് ഈ വമ്പൻ പോരാട്ടം അരങ്ങേറുന്നത്. സീസണിലെ ആദ്യ മത്സരത്തിൽ തന്നെ വിജയം നേടി ആധിപത്യം ഉറപ്പിക്കാനാണ് ഇരു ടീമുകളും ലക്ഷ്യമിടുന്നത്.
ഉദ്ഘാടന മത്സരത്തിന് പിന്നാലെ ഫുട്ബോൾ പ്രേമികൾക്ക് വിരുന്നായി ഇന്ന് മറ്റൊരു പോരാട്ടം കൂടി അരങ്ങേറുന്നുണ്ട്. രാത്രി 7:30 ന് ഗോവയിൽ നടക്കുന്ന മത്സരത്തിൽ എഫ്സി ഗോവയും ഐഎസ്എല്ലിലെ പുതുമുഖങ്ങളായ ഇന്റർകാശിയും തമ്മിലാണ് ഏറ്റുമുട്ടുക.
പുതിയ സീസൺ ആരംഭിക്കുമ്പോൾ ആരാധകർക്ക് ഏറ്റവും പ്രധാനപ്പെട്ട ഒന്നാണ് മത്സരങ്ങളുടെ തത്സമയ സംപ്രേക്ഷണ വിവരങ്ങൾ (ISL 2025-26 Live Streaming and Telecast). ഇത്തവണ ഐഎസ്എൽ മത്സരങ്ങളുടെ ഔദ്യോഗിക ടെലിവിഷൻ സംപ്രേക്ഷണാവകാശം സോണി സ്പോർട്സിനാണ്.
ISL 2025-26 Live Streaming and Telecast
സോണി സ്പോർട്സ് 2, സോണി സ്പോർട്സ് 2 എച്ച്ഡി എന്നീ ചാനലുകളിലൂടെ ആരാധകർക്ക് മത്സരങ്ങൾ തത്സമയം വീക്ഷിക്കാൻ സാധിക്കും. മലയാളം ഉൾപ്പെടെയുള്ള പ്രാദേശിക ഭാഷകളിലെ കമന്ററിയും ചാനലുകളിൽ ലഭ്യമാകുമെന്നാണ് സൂചന.
ടെലിവിഷന് പുറമെ ഡിജിറ്റൽ പ്ലാറ്റ്ഫോമുകളിലൂടെ മത്സരം കാണാൻ ആഗ്രഹിക്കുന്നവർക്കായി പ്രത്യേക ക്രമീകരണങ്ങളാണ് ഇത്തവണ ഒരുക്കിയിരിക്കുന്നത്.
. സോണി സ്പോർട്സ് 2 ( കേരളാ വിഷൻ ചാനൽ നമ്പർ: 764)
.സോണി സ്പോർട്സ് 2 എച്ച്ഡി: ( കേരളാ വിഷൻ ചാനൽ നമ്പർ: 860)
ഓൺലൈൻ സ്ട്രീമിംഗിൽ ഫാൻകോഡ് (FanCode) പ്ലാറ്റ്ഫോമിലൂടെ മാത്രമേ മത്സരങ്ങൾ തത്സമയം ലഭ്യമാകൂ. ആരാധകർക്ക് മിതമായ നിരക്കിൽ ഫുട്ബോൾ ആവേശം പങ്കുവെക്കാൻ വിവിധ സബ്സ്ക്രിപ്ഷൻ പ്ലാനുകളാണ് ഫാൻകോഡ് അവതരിപ്പിച്ചിരിക്കുന്നത്.
ഏതെങ്കിലും ഒരു പ്രത്യേക മത്സരം മാത്രം കാണാൻ ആഗ്രഹിക്കുന്നവർക്ക് 25 രൂപ നൽകി ആ സൗകര്യം പ്രയോജനപ്പെടുത്താം.
തന്റെ പ്രിയപ്പെട്ട ടീമിന്റെ മാത്രം മത്സരങ്ങൾ കാണാനാണ് താല്പര്യമെങ്കിൽ, ആ ടീമിന് സീസണിലുള്ള 13 മത്സരങ്ങൾ കാണാനായി 149 രൂപയുടെ പ്ലാൻ തിരഞ്ഞെടുക്കാം.
എന്നാൽ ഐഎസ്എല്ലിലെ മുഴുവൻ ആവേശവും നുകരാൻ ആഗ്രഹിക്കുന്നവർക്കായി 299 രൂപയ്ക്ക് സീസണിലെ ആകെ 91 മത്സരങ്ങളും തത്സമയം കാണാൻ സാധിക്കുന്ന പ്ലാനാണ് ഏറ്റവും ലാഭകരം.
മഞ്ഞപ്പടയുടെ കരുത്തും കൊൽക്കത്തൻ ഫുട്ബോളിന്റെ പാരമ്പര്യവും നേർക്കുനേർ വരുമ്പോൾ ഐഎസ്എൽ ഉദ്ഘാടന മത്സരം ഗാലറികളിലും ടെലിവിഷൻ സ്ക്രീനുകളിലും ആവേശം നിറയ്ക്കുമെന്നുറപ്പാണ്.
ബ്ലാസ്റ്റേഴ്സ് ഇത്തവണ കിരീടം ലക്ഷ്യമിട്ടാണ് ഇറങ്ങുന്നത്. മറുഭാഗത്ത് ഐഎസ്എല്ലിലെ വമ്പന്മാരായ മോഹൻ ബഗാൻ തങ്ങളുടെ നാട്ടിലെ കാണികളുടെ പിന്തുണയിൽ വിജയം ആവർത്തിക്കാൻ ശ്രമിക്കും.
ഐഎസ്എല്ലിലേക്ക് പുതിയ ടീമായി എത്തുന്ന ഇന്റർകാശി എഫ്സി ഗോവയെ അവരുടെ തട്ടകത്തിൽ എങ്ങനെ നേരിടുമെന്നതും ഇന്നത്തെ പ്രധാന ആകർഷണമാണ്.
ഫുട്ബോൾ മൈതാനങ്ങൾ ആരവങ്ങളാൽ നിറയാൻ ഇനി മണിക്കൂറുകൾ മാത്രമാണ് ബാക്കിയുള്ളത്.
ALSO READ: ഒരൊറ്റ ട്രാൻസ്ഫർ; ബ്ലാസ്റ്റേഴ്സ് ലാഭിച്ചത് 80 ലക്ഷം രൂപ
ALSO READ: ഗുരുവിനെ തേടി ശിഷ്യന്മാർ; ബ്ലാസ്റ്റേഴ്സിന് തലവേദനയായി മുൻ പരിശീലകൻ
content: ISL 2025-26 Live Streaming and Telecast