ഇംഗ്ലണ്ടിനെതിരായ ടെസ്റ്റ് പരമ്പരയിൽ ഇന്ത്യൻ ടീമിന് വലിയ തിരിച്ചടി. യുവ ഓൾറൗണ്ടർ നിതീഷ് കുമാർ റെഡ്ഡി പരിക്ക് കാരണം ശേഷിക്കുന്ന ടെസ്റ്റ് പരമ്പരയിൽ നിന്ന് പുറത്തായതായി റിപ്പോർട്ട്. ടൈംസ് ഓഫ് ഇന്ത്യയുടെ സാഹിൽ മൽഹോത്രയാണ് ഈ വാർത്ത പുറത്തുവിട്ടത്.
സമീപകാലത്തായി ഇന്ത്യൻ റെഡ് ബോൾ ക്രിക്കറ്റിൽ മികച്ച പ്രകടനങ്ങളിലൂടെ ശ്രദ്ധ നേടിയ താരമാണ് നിതീഷ് കുമാർ റെഡ്ഡി. ബാറ്റ് കൊണ്ടും ബോൾ കൊണ്ടും ടീമിന് മുതൽക്കൂട്ടാകാൻ കഴിവുള്ള താരമെന്ന നിലയിൽ ടെസ്റ്റ് പരമ്പരയിൽ അദ്ദേഹത്തിന്റെ സേവനം ഇന്ത്യക്ക് നിർണായകമായിരുന്നു. ഈ സാഹചര്യത്തിൽ പരിക്ക് കാരണം പുറത്താകുന്നത് നിരാശാജനകമാണ്.
പരിക്കിന്റെ സ്വഭാവത്തെക്കുറിച്ചോ, എത്രനാൾ താരത്തിന് വിശ്രമം വേണ്ടിവരുമെന്നതിനെക്കുറിച്ചോ ഔദ്യോഗിക വിവരങ്ങൾ ലഭ്യമല്ല. എങ്കിലും, ഇംഗ്ലണ്ടിനെതിരായ പ്രധാനപ്പെട്ട പരമ്പരയിൽ നിന്ന് ഒരു യുവ ഓൾറൗണ്ടറെ നഷ്ടപ്പെടുന്നത് ടീം മാനേജ്മെന്റിന് തലവേദന സൃഷ്ടിക്കും.
നിതീഷ് കുമാർ റെഡ്ഡിയുടെ അഭാവം ടീമിന്റെ സന്തുലിതാവസ്ഥയെ ബാധിച്ചേക്കാം. ഒരു ബാക്കപ്പ് ഓൾറൗണ്ടറുടെ സ്ഥാനത്തേക്ക് ആര് വരുമെന്ന് കണ്ടറിയണം.
നിതീഷിന് പകരം നാലാം ടെസ്റ്റിൽ ശാർദൂൽ താക്കൂർ തിരിച്ചെത്താൻ സാധ്യതയുണ്ട്.