ഇന്ത്യൻ ക്രിക്കറ്റ് ആരാധകരെ ആവേശത്തിലാക്കുന്ന വാർത്തകളാണ് ദേശീയ മാധ്യമങ്ങളിലൂടെ പുറത്തുവരുന്നത്. വരാനിരിക്കുന്ന അയർലൻഡ്, ഇംഗ്ലണ്ട് പര്യടനങ്ങൾക്കായി പുതിയൊരു ടീമിനെ വാർത്തെടുക്കാനുള്ള തയ്യാറെടുപ്പിലാണ് ബിസിസിഐ.
ഇതിൽ ഏറ്റവും ശ്രദ്ധേയമായത് മലയാളി താരം സഞ്ജു സാംസണിന് (Sanju Samson) ലഭിക്കാനിടയുള്ള പുതിയ ഉത്തരവാദിത്തമാണ്. സൂര്യകുമാർ യാദവിന് പകരം പുതിയൊരു നേതൃനിരയെ പരീക്ഷിക്കാൻ ബിസിസിഐ ഒരുങ്ങുമ്പോൾ സഞ്ജു സാംസൺ നിർണ്ണായക സ്ഥാനത്തേക്ക് എത്തുമെന്നാണ് സൂചനകൾ.
കഴിഞ്ഞ ലോകകപ്പിൽ ഇന്ത്യയെ കിരീടത്തിലേക്ക് നയിച്ച സൂര്യകുമാർ യാദവിനെ നായകസ്ഥാനത്ത് നിന്ന് മാറ്റാനാണ് നീക്കം നടക്കുന്നത്. പ്രായവും നിലവിലെ ബാറ്റിംഗ് ഫോമിലെ ഇടിവുമാണ് ഇത്തരമൊരു കടുത്ത തീരുമാനത്തിന് പിന്നിലെന്നാണ് റിപ്പോർട്ടുകൾ .
സൂര്യകുമാറിന് പകരം ശ്രേയസ് അയ്യർ പുതിയ നായകനായി എത്തിയേക്കും. എന്നാൽ ആരാധകർ ഉറ്റുനോക്കുന്നത് സഞ്ജു സാംസണിന്റെ റോളിലേക്കാണ്.
ശ്രേയസ് അയ്യർ ടീമിനെ നയിക്കുമ്പോൾ ഉപനായകന്റെ റോളിൽ സഞ്ജു സാംസൺ എത്തുമെന്നാണ് റിപോർട്ടുകൾ. രാജസ്ഥാൻ റോയൽസിനെ നയിച്ചുള്ള പരിചയസമ്പത്തും സഞ്ജുവിന്റെ ശാന്തമായ സ്വഭാവവും ഈ സ്ഥാനത്തേക്ക് അദ്ദേഹത്തെ പരിഗണിക്കാൻ കാരണമാകുന്നു.
ഇന്ത്യൻ ടീമിന്റെ പരിശീലകൻ ഗൗതം ഗംഭീറിന് സഞ്ജു സാംസണിനോടുള്ള പ്രത്യേക താല്പര്യം ക്രിക്കറ്റ് ലോകത്ത് പരസ്യമായ കാര്യമാണ്.
സഞ്ജുവിന്റെ ആക്രമണോത്സുകമായ ബാറ്റിംഗ് ശൈലി ടീമിന് ഗുണകരമാകുമെന്ന് ഗംഭീർ വിശ്വസിക്കുന്നു.
സെലക്ഷൻ കമ്മിറ്റിയിലെ ചില അംഗങ്ങൾക്ക് സഞ്ജുവിനോട് അത്ര താല്പര്യമില്ലെങ്കിലും പരിശീലകന്റെ പിന്തുണ അദ്ദേഹത്തിന് തുണയാകാനാണ് സാധ്യത.
2028 ലെ ലോകകപ്പ് ലക്ഷ്യം വെച്ചാണ് ബിസിസിഐ പുതിയ പദ്ധതികൾ തയ്യാറാക്കുന്നത്.
ഇതിന്റെ ഭാഗമായി പല പ്രമുഖ താരങ്ങൾക്കും വിശ്രമം നൽകാനും യുവതാരങ്ങൾക്ക് അവസരം നൽകാനും തീരുമാനിച്ചിട്ടുണ്ട്.
വരാനിരിക്കുന്ന പര്യടനങ്ങൾക്കുള്ള സാധ്യതാ സ്ക്വാഡ് പരിശോധിക്കാം..
ശ്രേയസ് അയ്യര് (ക്യാപ്റ്റന്), സഞ്ജു സാംസണ് (വൈസ് ക്യാപ്റ്റന്, വിക്കറ്റ് കീപ്പര്), അഭിഷേക് ശര്മ, രജത് പാട്ടിധാര്, ഇഷാന് കിഷന് (വിക്കറ്റ് കീപ്പര്), നിതീഷ് കുമാര് റെഡ്ഡി, ശിവം ദുബെ, അക്ഷര് പട്ടേല്, കുല്ദീപ് യാദവ്, പ്രിന്സ് യാദവ്, അര്ഷ്ദീപ് സിങ്.
തിലക് വർമ്മയെപ്പോലെയുള്ള താരങ്ങൾ മോശം ഫോം മൂലം പുറത്താകാൻ സാധ്യതയുള്ളപ്പോൾ രജത് പാട്ടിധാറിനെപ്പോലെയുള്ളവർക്ക് മധ്യനിരയിൽ സ്ഥാനം ലഭിച്ചേക്കും.
സൂര്യകുമാറിന്റെ ഫോമിലെ ഇടിവ്
രോഹിത് ശർമ്മയുടെ പിൻഗാമിയായി നായകസ്ഥാനം ഏറ്റെടുത്ത ശേഷം സൂര്യകുമാർ യാദവിന്റെ ബാറ്റിംഗിൽ വലിയ ഇടിവുണ്ടായതായി കണക്കുകൾ വ്യക്തമാക്കുന്നു.
നായകനായ ശേഷം കളിച്ച നാൽപ്പത്തിയഞ്ച് മത്സരങ്ങളിൽ നിന്ന് വെറും 932 റൺസ് മാത്രമാണ് അദ്ദേഹത്തിന് നേടാനായത്.
ഈ സാഹചര്യത്തിൽ മികച്ച ഫോമിലുള്ള ശ്രേയസ് അയ്യരെയും സഞ്ജു സാംസണെയും നേതൃസ്ഥാനത്തേക്ക് കൊണ്ടുവരുന്നത് ഗുണകരമാകുമെന്നാണ് ബിസിസിഐയുടെ വിലയിരുത്തൽ.
കൊൽക്കത്തയെ കിരീടത്തിലേക്ക് നയിച്ച ശ്രേയസിന്റെ റെക്കോർഡും ഇതിന് ആക്കം കൂട്ടുന്നു.അയർലൻഡ് പര്യടനത്തിന് ശേഷം ഇംഗ്ലണ്ടിനെതിരെ അഞ്ച് മത്സരങ്ങളടങ്ങിയ വലിയ പരമ്പരയാണ് ഇന്ത്യയെ കാത്തിരിക്കുന്നത്.
ഈ മത്സരങ്ങളിലൂടെ പുതിയ നേതൃത്വത്തിന് കീഴിൽ ടീമിനെ സജ്ജമാക്കുക എന്നതാണ് ബിസിസിഐ ലക്ഷ്യം വെക്കുന്നത്.
സഞ്ജു സാംസണെപ്പോലെയുള്ള ഒരു താരത്തിന് കൂടുതൽ ഉത്തരവാദിത്തങ്ങൾ നൽകുന്നത് അദ്ദേഹത്തിന്റെ ബാറ്റിംഗിലും നല്ല മാറ്റങ്ങൾ കൊണ്ടുവരുമെന്ന് ആരാധകർ പ്രതീക്ഷിക്കുന്നു.
മലയാളി താരം ഇന്ത്യൻ ടീമിന്റെ പദവികളിലേക്ക് ഉയരുന്നത് കേരളത്തിലെ ക്രിക്കറ്റ് പ്രേമികൾക്കും വലിയ ആവേശം നൽകുന്ന കാര്യമാണ്.
ഔദ്യോഗികമായ പ്രഖ്യാപനം ജൂൺ അവസാനത്തോടെ ഉണ്ടാകുമെന്നാണ് സൂചനകൾ.
ALSO READ: 3 താരങ്ങൾ CSK- യിൽ നിന്ന് പുറത്തേക്ക്: പൊളിച്ചെഴുത്ത് ലക്ഷ്യമിട്ട് മാനേജ്മെന്റ്
English Summary: Indian cricket is set for a major overhaul as reports suggest Sanju Samson might be appointed as the vice-captain for the upcoming T20 series. While Shreyas Iyer is expected to lead the team, Sanju’s leadership skills and form make him a top contender for the deputy role.