ഫുട്ബോൾ ലോകത്തെ കണ്ണീരിലാഴ്ത്തുന്ന വാർത്തയാണ് ഈ മണിക്കൂറുകളിൽ പുറത്ത് വരുന്നത്. പോർച്ചുഗീസ് ദേശീയ താരവും ലിവർപൂളിന്റെ മുന്നേറ്റനിര താരവുമായ ഡീഗോ ജോട്ട (28) വാഹനാപകടത്തിൽ മരണപ്പെട്ടു എന്ന വാർത്ത ആരാധകരെ അക്ഷരാർത്ഥത്തിൽ ഞെട്ടിച്ചിരിക്കുകയാണ്.
ഇന്ന് (ജൂലൈ 3, 2025) സ്പെയിനിൽ വെച്ചുണ്ടായ അപകടത്തിൽ ജോട്ടയുടെ സഹോദരൻ ആന്ദ്രേ ഫെലിപ്പും (26) മരണപ്പെട്ടതായി സ്പാനിഷ് സിവിൽ ഗാർഡ് സ്ഥിരീകരിച്ചു.സാമോറയ്ക്ക് സമീപം A52 ഹൈവേയിൽ വെച്ച് ഇരുവരും സഞ്ചരിച്ച ലംബോർഗിനി കാറിന്റെ ടയർ പൊട്ടിത്തെറിച്ച് നിയന്ത്രണം വിട്ട് മരത്തിലിടിച്ച് തീപിടിക്കുകയായിരുന്നു.
ജോട്ടയുടെ വിവാഹം കഴിഞ്ഞ് ദിവസങ്ങൾ മാത്രം പിന്നിടുമ്പോഴാണ് ഈ ദാരുണമായ സംഭവം. ജൂൺ 22-നായിരുന്നു റൂട്ടെ കാർഡോസോയുമായുള്ള അദ്ദേഹത്തിന്റെ വിവാഹം.
2020-ൽ ലിവർപൂളിൽ എത്തിയ ജോട്ട, ക്ലബ്ബിനായി 180-ലധികം മത്സരങ്ങളിൽ കളിക്കുകയും പ്രീമിയർ ലീഗ്, എഫ്എ കപ്പ്, ലീഗ് കപ്പ് തുടങ്ങിയ പ്രധാന കിരീടങ്ങൾ നേടുകയും ചെയ്തു. വോൾവർഹാംപ്ടൺ, പോർട്ടോ, അത്‌ലറ്റിക്കോ മാഡ്രിഡ് തുടങ്ങിയ ക്ലബ്ബുകളിലും അദ്ദേഹം കളിച്ചിട്ടുണ്ട്.
പോർച്ചുഗൽ ദേശീയ ടീമിനായും ജോട്ട മികച്ച പ്രകടനങ്ങൾ കാഴ്ചവച്ചിട്ടുണ്ട്. 2019-ൽ അരങ്ങേറ്റം കുറിച്ച അദ്ദേഹം യൂറോ 2022, യൂറോ 2024 എന്നിവയിൽ ടീമിന്റെ പ്രധാന ഭാഗമായിരുന്നു. 2022 ലോകകപ്പ് പരിക്ക് കാരണം നഷ്ടമായിരുന്നു.