ഇന്ത്യൻ ഫുട്ബോൾ ആരാധകർ വർഷങ്ങളായി സ്വപ്നം കണ്ടിരുന്നൊരു നിമിഷത്തിനാണ് ഇനി മാസങ്ങൾ മാത്രം ബാക്കിയുള്ളത്. കാൽപന്തിന്റെ സുൽത്താന്മാരായ ബ്രസീൽ ദേശീയ ടീം ഇന്ത്യൻ മണ്ണിൽ കളിക്കാനെത്തുന്നു എന്ന വാർത്ത കേട്ടതുമുതൽ ആവേശത്തിന്റെ കൊടുമുടിയിലാണ് രാജ്യത്തെ ഫുട്ബോൾ പ്രേമികൾ.
ബ്രസീലിയൻ ഫുട്ബോൾ അസോസിയേഷനും എഐഎഫ്എഫും ഔദ്യോഗികമായി സ്ഥിരീകരിച്ച ഈ പോരാട്ടം ഒക്ടോബർ 3-ന് കൊൽക്കത്തയിലെ വിവേകാനന്ദ യുവഭാരതി ക്രീരംഗനിലാണ് (വൈബികെ സ്റ്റേഡിയം) നടക്കുന്നത്.
എന്നാൽ, ആവേശം വാനോളമുയരുമ്പോഴും ആരാധകരുടെ മനസ്സിൽ വലിയൊരു ചോദ്യം ബാക്കിയുണ്ടായിരുന്നു. വിനീഷ്യസ് ജൂനിയർ, റോഡ്രിഗോ, എൻഡ്രിക്ക്, ബ്രൂണോ ഗിമറെസ്, അലിസൺ തുടങ്ങിയ സാമ്പാ പടയിലെ സൂപ്പർ താരങ്ങൾ കൊൽക്കത്തയിലെ മൈതാനത്ത് ബൂട്ട് കെട്ടിയിറങ്ങുമോ എന്നതായിരുന്നു അത്.
ആരാധകരുടെ ഈ വലിയ സംശയത്തിന് ഇപ്പോൾ വ്യക്തമായ മറുപടിയുമായി രംഗത്തെത്തിയിരിക്കുകയാണ് ബ്രസീലിന്റെ തന്ത്രജ്ഞനായ മുഖ്യപരിശീലകൻ കാർലോ ആഞ്ചലോട്ടി.
വരാനിരിക്കുന്ന ലോകകപ്പ് മുന്നിൽ കണ്ടുകൊണ്ട് ടീമിൽ ചില നിർണായക മാറ്റങ്ങൾക്ക് ഒരുങ്ങുകയാണ് ബ്രസീലിയൻ മാനേജ്മെന്റ്. ടീമിന്റെ ഭാവി സുരക്ഷിതമാക്കാൻ കഴിവുള്ള ഒരുപിടി യുവതാരങ്ങളെ ദേശീയ ടീമിലേക്ക് കൊണ്ടുവരേണ്ടതുണ്ട്. അവർക്ക് അന്താരാഷ്ട്ര തലത്തിൽ മതിയായ പരിചയസമ്പത്ത് നൽകാനുള്ള മികച്ചൊരു അവസരമായാണ് ഇന്ത്യയ്ക്കെതിരെയും ഓസ്ട്രേലിയയ്ക്കെതിരെയുമുള്ള ഈ സൗഹൃദ മത്സരങ്ങളെ തങ്ങൾ കാണുന്നതെന്ന് ആഞ്ചലോട്ടി വ്യക്തമാക്കി.
ഇന്ത്യയ്ക്കെതിരായ മത്സരത്തിൽ കൂടുതൽ അവസരം ലഭിക്കുക പുതുമുഖങ്ങൾക്കും യുവതാരങ്ങൾക്കുമായിരിക്കുമെന്നാണ് പരിശീലകന്റെ വാക്കുകൾ സൂചിപ്പിക്കുന്നത്.
എന്നാൽ അതിനർത്ഥം ടീമിലെ അനുഭവസമ്പന്നരായ സീനിയർ താരങ്ങളെ പൂർണ്ണമായി ഒഴിവാക്കുമെന്നല്ല. യുവരക്തത്തിന് മുൻഗണന നൽകുന്നതിനൊപ്പം പരിചയസമ്പന്നരായ ചില പ്രധാന താരങ്ങളും ഈ സംഘത്തിലുണ്ടാകാൻ തന്നെയാണ് സാധ്യത. എന്നാൽ കൂടുതലും യുവതാരങ്ങളും പുതുമുഖങ്ങളുമായിരിക്കും.
ഇന്ത്യയിലെ ആരാധകർ ആകാംക്ഷയോടെ കാത്തിരിക്കുന്ന ആ അന്തിമ സ്ക്വാഡ് പ്രഖ്യാപനം സെപ്റ്റംബർ അവസാന വാരത്തോടെ ഉണ്ടാകുമെന്നാണ് പ്രതീക്ഷിക്കുന്നത്.
ബ്രസീലിന്റെ വൻനിര താരങ്ങൾ മുഴുവനായി എത്തുന്നില്ലെങ്കിലും, നാളെയുടെ സൂപ്പർ താരങ്ങളുടെ പ്രകടനം നേരിട്ട് കാണാമെന്ന ആവേശത്തിൽ തന്നെയാണ് ഇന്ത്യൻ ഫുട്ബോൾ ലോകം.
ടിക്കറ്റ് ബുക്കിങ് ഉടൻ
മത്സരം പ്രഖ്യാപിച്ചെങ്കിലും മത്സരത്തിന്റെ ടിക്കറ്റ് ബുക്കിങ്ങിനെ പറ്റിയുള്ള വിവരങ്ങൾ പുറത്ത് വന്നിട്ടില്ല. വരും ദിവസങ്ങളിൽ എഐഎഫ്എഫ് ഇക്കാര്യത്തിൽ ഔദ്യോഗിക അറിയിപ്പ് പുറത്ത് വിടും.
85000 ആണ് മത്സരം നടക്കുന്ന വിവേകാനന്ദ യുവഭാരതി ക്രീരംഗനിലെ കപ്പാസിറ്റി.
ബ്രസീൽ ദേശീയ ടീം എത്തുന്നതിനാൽ തന്നെ വലിയ ടിക്കറ്റ് നിരക്ക് ആയിരിക്കും ഉണ്ടാവുക
ALSO READ:
- ബ്ലാസ്റ്റേഴ്സിന് പുതിയ ഉടമകളായി, ഇനി സൈനിംഗുകൾ: 2 പേർ ടീമിൽ തുടരും
- റയലിനെയും ബാഴ്സയേയും നേരിട്ട താരം: യുവമിഡ്ഫീൽഡർക്കായി ബ്ലാസ്റ്റേഴ്സും ബഗാനും ശ്രമം നടത്തുന്നതായി റിപ്പോർട്ട്
- വരുന്നു ബ്ലാസ്റ്റേഴ്സിന്റെ സൈനിങ്ങുകൾ: ഒരു പിടി മികച്ച താരങ്ങൾ പെൻഡിങ് പട്ടികയിൽ
English Summary: Ahead of the Brazil vs India Friendly in Kolkata on October 3, head coach Carlo Ancelotti revealed that the squad will prioritize emerging youth talent to build for the future, alongside select senior stars. The final team announcement for the match is expected by late September.