ഇന്ത്യൻ ഫുട്ബോൾ ടീമിന്റെ പുതിയ പരിശീലകനായി നിയമിതനായ ഖാലിദ് ജമീൽ ഇന്ത്യൻ താരങ്ങൾക്കായി ബംഗളുരുവിൽ ഒരു പരിശീലന ക്യാമ്പ് ഒരുക്കുകയാണ്. ഡ്യൂറൻഡ് കപ്പിൽ പങ്കെടുക്കാത്ത 22 കളിക്കാരെയാണ് അദ്ദേഹം ബംഗളൂരുവിലെ ക്യാമ്പിലേക്ക് ക്ഷണിച്ചത്. എന്നാൽ, ഖാലിദ് ജമീൽ തിരഞ്ഞെടുത്ത താരങ്ങളുടെ പട്ടിക കണ്ടപ്പോൾ കേരളാ ബ്ലാസ്റ്റേഴ്സ് ആരാധകർക്കും അമ്പരപ്പുണ്ട്, കാരണം ബ്ലാസ്റ്റേഴ്സിൽ നിന്നും നിന്ന് ഒരു താരം മാത്രമാണ് ഈ ലിസ്റ്റിൽ ഇടംപിടിച്ചത്. അതും ആരാധകരാരും പ്രതീക്ഷിക്കാത്തൊരു താരം.
ബ്ലാസ്റ്റേഴ്സ് ആരാധകരുടെ വിമർശനങ്ങളുടെയും പരിഹാസങ്ങളുടെയും നടുവിൽ നിന്നിരുന്ന ഡാനിഷ് ഫാറൂഖിയാണ് ഖാലിദ് ജമീലിന്റെ ലിസ്റ്റിൽ ഇടം പിടിച്ച ഏക ബ്ലാസ്റ്റേഴ്സ് താരം. മറ്റ് ക്ലബ്ബുകളിൽ നിന്ന് ഒന്നിലധികം കളിക്കാർ ദേശീയ ടീം ക്യാമ്പിലെത്തിയപ്പോൾ, ഡാനിഷ് ഒറ്റയ്ക്ക് ബ്ലാസ്റ്റേഴ്സിന്റെ യശസ്സ് കാത്തു.
ഒരു ക്ലബ്ബിന്റെ യഥാർത്ഥ കരുത്ത് അതിലെ കളിക്കാരുടെ ദേശീയ ടീം സാന്നിധ്യത്തിലൂടെ വിലയിരുത്തപ്പെടാറുണ്ട്. വിമർശനങ്ങളിൽ തളരാതെ, കഠിനാധ്വാനത്തിലൂടെ ദേശീയ ടീം ക്യാമ്പിൽ ഇടം നേടിയ ഡാനിഷ് ഒരു പ്രചോദനമാണ്.
കളിക്കളത്തിലെ ഡാനിഷിന്റെ പ്രകടന മികവാണ് അദ്ദേഹത്തെ ദേശീയ ടീം പരിശീലകന്റെ ശ്രദ്ധയിൽ കൊണ്ടെത്തിച്ചത്. ഈ നേട്ടം, ഭാവിയിൽ ബ്ലാസ്റ്റേഴ്സിലെ കൂടുതൽ താരങ്ങൾക്ക് കഠിനാധ്വാനം ചെയ്യാനുള്ള പ്രചോദനമാകുമെന്ന് പ്രതീക്ഷിക്കാം.
ഖാലിദ് ജമീലിന്റെ 22 അംഗ ടീം:
ഗോൾകീപ്പർമാർ: അമരീന്ദർ സിംഗ്, ഗുർപ്രീത് സിംഗ് സന്ധു, ഹൃതിക് തിവാരി.
പ്രതിരോധ താരങ്ങൾ: ആകാശ് മിശ്ര, അലക്സ് സാജി, ബോറിസ് സിംഗ് താങ്ജം, ചിങ്ലെൻസാന സിംഗ് കോൻഷാം, ഹിമിങ്തൻമാവിയ റാൽറ്റെ, രാഹുൽ ഭേക്കെ, റോഷൻ സിംഗ് നൊറാം, സന്ദേശ് ജിംഗൻ, സുനിൽ ബെഞ്ചമിൻ.
മധ്യനിര താരങ്ങൾ: ആഷിക് കുരുണിയൻ, ഡാനിഷ് ഫാറൂഖ് ഭട്ട്, നിഖിൽ പ്രഭു, രാഹുൽ കണ്ണോലി പ്രവീൺ, സുരേഷ് സിംഗ് വാങ്ജം, ഉദാന്ത സിംഗ് കുമാം.
മുന്നേറ്റ താരങ്ങൾ: ഇർഫാൻ യാദ്വാദ്, ലാലിയൻസ്വാല ചാങ്തെ, റഹീം അലി, വിക്രം പ്രതാപ് സിംഗ്.