ഇന്ത്യൻ ക്രിക്കറ്റിലെ യുവസെൻസേഷനും ഏഷ്യ കപ്പ് 2025-ലെ പ്ലെയർ ഓഫ് ദ ടൂർണമെന്റുമായ അഭിഷേക് ശർമ്മ, തന്റെ കരിയറിലെ വഴിത്തിരിവായ സുപ്രധാന നിമിഷം വെളിപ്പെടുത്തിയിരിക്കുകയാണ്. അന്താരാഷ്ട്ര ക്രിക്കറ്റിന്റെ തുടക്കത്തിൽ മോശം പ്രകടനങ്ങൾ കാരണം കടുത്ത സമ്മർദ്ദം നേരിട്ടപ്പോൾ, ഇന്ത്യൻ ടി20 ക്യാപ്റ്റൻ സൂര്യകുമാർ യാദവ് നൽകിയ ഉറപ്പാണ് തന്റെ കളിശൈലി തന്നെ മാറ്റിമറിച്ചതെന്ന് അഭിഷേക് വെളിപ്പെടുത്തി.
ദേശീയ ടീമിൽ അരങ്ങേറ്റം കുറിച്ച ശേഷം ബംഗ്ലാദേശിനെതിരായ പരമ്പരയിൽ തുടർച്ചയായ ഇന്നിംഗ്സുകളിൽ അഭിഷേക് ശർമ്മ വേഗത്തിൽ പുറത്തായിരുന്നു. ഈ സമയത്താണ് ക്യാപ്റ്റൻ സൂര്യകുമാർ യാദവ് താരത്തിന് ശക്തമായ പിന്തുണനൽകിയത്. “നിങ്ങൾ എനിക്ക് വളരെ പ്രധാനപ്പെട്ട കളിക്കാരനാണ്. നിങ്ങൾ 15 തവണ പൂജ്യത്തിന് പുറത്തായാലും, അടുത്ത കളി നിങ്ങൾ കളിച്ചിരിക്കും. ഇത് ഞാൻ എഴുതി നൽകാം,” എന്നായിരുന്നു സൂര്യകുമാർ അഭിഷേകിന് നൽകിയ ഉറപ്പ്.
ക്യാപ്റ്റനിൽ നിന്ന് ലഭിച്ച ഈ സന്ദേശം തന്നെ സംബന്ധിച്ച് വളരെ വലുതായിരുന്നു എന്നും, നന്നായി കളിക്കണമെങ്കിൽ വ്യത്യസ്തമായി എന്തെങ്കിലും ചെയ്യണമെന്ന് ആ നിമിഷം താൻ ഉറപ്പിച്ചെന്നും അഭിഷേക് പറഞ്ഞു. ബ്രേക്ക്ഫാസ്റ്റ് വിത്ത് ചാമ്പ്യന്സ് എന്ന പരിപാടിയില് ഗൗരവ് കപൂറുമായി സംസാരിക്കുകയായിരുന്നു അദ്ദേഹം.
ക്യാപ്റ്റന്റെ പിന്തുണ ലഭിച്ചതോടെ ‘വിക്കറ്റ് നഷ്ടമായാലും വേണ്ടില്ല, ഞാൻ എന്റെ ശൈലിയിൽ കളിക്കും’ എന്ന മാനസികാവസ്ഥയിലേക്ക് താൻ മാറിയെന്നും ഈ ധൈര്യമാണ് ഏഷ്യ കപ്പിൽ തകർപ്പൻ പ്രകടനം കാഴ്ചവെക്കാൻ അദ്ദേഹത്തെ സഹായിച്ചതെന്നും അദ്ദേഹം പറഞ്ഞു.
ക്യാപ്റ്റന്റെ പിന്തുണയും സ്വന്തം ശൈലിയിലുള്ള വിശ്വാസവും അടിവരയിട്ടുകൊണ്ട് അഭിഷേക് ശർമ്മ ഏഷ്യ കപ്പിൽ മിന്നുന്ന പ്രകടനമാണ് നടത്തിയത്. ഏഴ് ഇന്നിംഗ്സുകളിലായി 314 റൺസ് നേടിയ താരം ടൂർണമെന്റിലെ കൂടുതൽ റൺസ് നേടുന്ന താരമായി. ഏതാണ്ട് 200 സ്ട്രൈക്ക് റേറ്റിൽ ബാറ്റ് വീശിയ അദ്ദേഹം, 19 സിക്സറുകളുമായി ഈ ടൂർണമെന്റിലെ സിക്സറുകളുടെ റെക്കോർഡും സ്വന്തമാക്കി.
content: Skipper Suryakumar Yadav assures Abhishek Sharma that he will be in the team even if he performs poorly