ഐ.പി.എൽ. ചരിത്രത്തിൽ തങ്ങളുടെ കളിയോടൊപ്പം തന്നെ ക്രിയാത്മകമായ മാർക്കറ്റിംഗ് തന്ത്രങ്ങൾകൊണ്ടും ആരാധകരെ പിടിച്ചിരുത്തുന്ന ഫ്രാഞ്ചൈസിയാണ് ചെന്നൈ സൂപ്പർ കിംഗ്സ് (CSK). ഐ.പി.എൽ. 2026 ലേലത്തിൽ ടീം ലക്ഷ്യമിടുന്ന പ്രധാന താരങ്ങളെക്കുറിച്ചുള്ള സൂചനകൾ നൽകിക്കൊണ്ട് അവർ പുറത്തിറക്കിയ ഒരു വീഡിയോയും ഇപ്പോൾ സോഷ്യൽ മീഡിയയിൽ ചർച്ചയാവുകയാണ്. ഒരു മിനിറ്റും 37 സെക്കൻഡും ദൈർഘ്യമുള്ള ഈ വീഡിയോയിൽ, ടീമിൻ്റെ ഭാഗ്യചിഹ്നമായ ‘ലിയോ’യെ ഒരു പച്ചക്കറി മാർക്കറ്റിലെ ഷോപ്പിംഗ് യാത്രയിലാണ് അവതരിപ്പിക്കുന്നത്.
CSK Auction തന്ത്രങ്ങളെക്കുറിച്ചുള്ള വ്യക്തമായ ചിത്രവും ഈവീഡിയോ നൽകുന്നുണ്ട്. ലേലത്തിലെ അവരുടെ പ്രധാന മൂന്ന് മുൻഗണനകൾ എന്തായിരിക്കും എന്നതിലേക്കാണ് വീഡിയോ വിരൽ ചൂണ്ടുന്നത്. എന്നാൽ ഓസ്ട്രേലിയയുടെ വമ്പൻ ഓൾറൗണ്ടർ കാമറൂൺ ഗ്രീനെ സ്വന്തമാക്കുന്നതിനെക്കുറിച്ച് യാതൊരു സൂചനയും നൽകാത്തത് പലരെയും അമ്പരപ്പിച്ചു. യാതൊരു സൂചനയും നൽകിയില്ല എന്ന് മാത്രമല്ല, ഗ്രീനിന്റെ കാര്യത്തിൽ ലിയോ ‘നോ’ പറയുന്നതും വീഡിയോയിൽ കാണാൻ സാധിക്കും. സിഎസ്കെയുടെ ലേലപദ്ധതിയിൽ ഗ്രീൻ ഇല്ല എന്നതിന്റെ സൂചനയാണ് ഇതെന്നാണ് വിലയിരുത്തപ്പെടുന്നത്.
ലിയോയുടെ മൂന്ന് ചോയ്സുകൾ
വീഡിയോയുടെ ഏറ്റവും ശ്രദ്ധേയമായ ക്ലൈമാക്സിൽ, ലിയോ കൃത്യമായി മൂന്ന് സാധനങ്ങൾ മാത്രം വാങ്ങി സഞ്ചിയിൽ വെക്കുന്നതാണ് കാണിക്കുന്നത്. ഈ മൂന്ന് വസ്തുക്കളാണ് സൂചനകളുടെ കേന്ദ്രബിന്ദുവായി മാറിയതും.
1. കിവി ഫ്രൂട്ട്
ലിയോ ആദ്യം വാങ്ങിയത് കിവി ഫ്രൂട്ടാണ്. ‘കിവി’ എന്ന വിളിപ്പേര് ന്യൂസിലൻഡിലെ കായിക താരങ്ങളുമായി ബന്ധപ്പെട്ടിരിക്കുന്നതിനാൽ, ന്യൂസിലൻഡിൽ നിന്നുള്ള ഒരു പ്രധാന കളിക്കാരനെ സ്വന്തമാക്കാൻ CSK ശ്രമിക്കുന്നു എന്നതിലേക്കാണ് ഇത് വിരൽ ചൂണ്ടുന്നത്. സിഎസ്കെയിലെ അപ്പോഴും ഒരു കിവി സാനിധ്യം ഉണ്ടാവാറുണ്ട്. രചിൻ രവീന്ദ്ര, ഡെവോൺ കോൺവെ എന്നിവരെ ഇത്തവണ കൈയൊഴിഞ്ഞ സിഎസ്കെയിലേക്ക് ലേലത്തിലൂടെ വീണ്ടുമൊരു ന്യൂസിലാൻഡ് താരം എത്തുമെന്നാണ് വീഡിയോ നൽകുന്ന സൂചന.
2. ആപ്പിൾ
ലിയോയുടെ ഷോപ്പിംഗ് ലിസ്റ്റിലെ രണ്ടാമത്തെ ഐറ്റം ആപ്പിളാണ്. ആപ്പിളിൻ്റെ പേരിലൂടെ ജമ്മു കശ്മീരിനെയാണ് CSK സൂചിപ്പിക്കുന്നതെന്നാണ് ആരാധകർ കണ്ടെത്തിയത്. ഈ സൂചന വിരൽ ചൂണ്ടുന്നത് യുവ പേസ് സെൻസേഷനായ ഔഖിബ് നബിയിലേക്കാണ്. ദുലീപ് ട്രോഫിയിൽ വെറും നാല് പന്തുകളിൽ നാല് വിക്കറ്റുകൾ വീഴ്ത്തി ഔഖിബ് സമീപകാലത്ത് വലിയ ശ്രദ്ധ നേടിയിരുന്നു. സിഎസ്കെയുടെ ലേല തന്ത്രത്തിൽ ഔഖിബ് ഉൾപ്പെടുന്നതാണ് വീഡിയോ നൽകുന്ന സൂചന.
3. ലോക്കൽ മിക്സ്ചർ പാക്കറ്റ്
സഞ്ചിയിൽ വെച്ച മൂന്നാമത്തെ ഇനം ഒരു ലോക്കൽ ‘മിക്സ്ചർ’ സ്നാക്ക് പാക്കറ്റായിരുന്നു. ഇത് ഫ്രാഞ്ചൈസിയുടെ ഹോം സ്റ്റേറ്റായ തമിഴ്നാടുമായി ബന്ധമുള്ള ഒരു കളിക്കാരനിലേക്കാണ് വഴി തെളിയിക്കുന്നത്. ഇത് മധ്യനിര ബാറ്റ്സ്മാനും ഓൾറൗണ്ടറുമായ വെങ്കടേഷ് അയ്യരുമായി ബന്ധിപ്പിക്കപ്പെടുന്നതായാണ് സൂചന. വെങ്കടേഷ് ഇൻഡോറിൽ ജനിച്ച താരമാണെങ്കിലും അദ്ദേഹത്തിന്റെ കുടുംബത്തിന് തമിഴ്നാട്ടിൽ ശക്തമായ വേരുകളുണ്ട്. കഴിഞ്ഞ സീസണിലെ മോശം പ്രകടനത്തെത്തുടർന്ന് കൊൽക്കത്ത നൈറ്റ് റൈഡേഴ്സ് (KKR) ഒഴിവാക്കിയ വെങ്കടേഷിനെ, പരിചയസമ്പന്നനായ ഒരു ഇന്ത്യൻ ഓൾറൗണ്ടറെന്ന നിലയിൽ, മിഡിൽ ഓർഡർ ശക്തിപ്പെടുത്തുന്നതിനായി CSK Auction വഴി സ്വന്തമാക്കാൻ ശ്രമിച്ചേക്കാം.
കാമറൂൺ ഗ്രീനിനെ ഒഴിവാക്കിയതിൻ്റെ പിന്നിലെ തന്ത്രം
ലേലത്തിൽ ഏറ്റവും കൂടുതൽ വില കിട്ടാൻ സാധ്യതയുള്ള താരങ്ങളിൽ ഒരാളായ കാമറൂൺ ഗ്രീനെക്കുറിച്ച് യാതൊരു സൂചനയും വീഡിയോയിൽ ഇല്ലാത്തത് ആരാധകരെ അമ്പരപ്പിക്കുന്നുണ്ട്. ഇതിന് പിന്നിൽ ശക്തമായ ചില കാരണങ്ങൾ ഉണ്ടാവാം. അവ ഏതൊക്കെയാണ് പരിശോധിക്കാം..
- അമിത വില ഒഴിവാക്കൽ: ഗ്രീൻ ലേലത്തിൽ വലിയ വിലയ്ക്ക് വിറ്റുപോവാനുള്ള സാധ്യതയുണ്ട്. ആ ഭീമമായ തുക ഒരു താരത്തിന് വേണ്ടി മാത്രം ചെലവഴിക്കുന്നതിന് പകരം, ആ പണം ഉപയോഗിച്ച് തങ്ങളുടെ പ്ലാനുകൾക്കനുസരിച്ച് മൂന്നോ നാലോ കളിക്കാരെ ടീമിലെത്തിക്കാനാവും CSK Auction ടീം ശ്രമിക്കുന്നത്.
- റോൾ സ്പെഷ്യലൈസേഷൻ: ഗ്രീനിനെക്കാൾ, തങ്ങളുടെ ടീമിന് കൃത്യമായി ആവശ്യമുള്ള റോളുകളിൽ ഫിറ്റ് ആകുന്ന (ഉദാഹരണത്തിന് ന്യൂസിലാൻഡിൽ നിന്നുള്ള ഒരു ഡെത്ത് ഓവർ ബൗളർ) താരങ്ങളെയാവാം CSK തിരയുന്നത്.
ഈ സൂചനകൾ നൽകുന്നത്, വലിയ പേരുകൾക്ക് പിന്നാലെ പോകാതെ, കൃത്യമായ റോളുകൾ ചെയ്യാൻ കഴിവുള്ള, എന്നാൽ അത്രയേറെ ശ്രദ്ധിക്കപ്പെടാത്ത പ്രതിഭകളെയാണ് ചെന്നൈ ഇത്തവണത്തെ CSK Auction-ൽ ലക്ഷ്യമിടുന്നതെന്നാണ്. ലിയോയുടെ ഷോപ്പിംഗ് ലിസ്റ്റിന് പിന്നിലെ കളിക്കാർ ആരൊക്കെയായിരിക്കും എന്നറിയാൻ ആരാധകർ ലേലം വരെ ആകാംഷയോടെ കാത്തിരിക്കേണ്ടി വരും.
ALSO READ: ക്രിസ്റ്റ്യാനോ റൊണാൾഡോ ഹോളിവുഡിലേക്ക്; ഫാസ്റ്റ് & ഫ്യൂരിയസ് സീരിസിലേക്ക് ക്ഷണം