ലോകകപ്പ് ഫുട്ബോളിന്റെ കലാശപ്പോരാട്ടം കണ്ടുതീർത്ത മലയാളികളായ ഫുട്ബോൾ പ്രേമികളിൽ എത്രപേർ ശ്രദ്ധിച്ചിട്ടുണ്ടാകും ആ ഒരു കാര്യം? അർജന്റീനയെ വീഴ്ത്തി സ്പെയിൻ ലോകകിരീടത്തിൽ മുത്തമിട്ടപ്പോൾ, ആ സ്പാനിഷ് പടയിലെ ഒരു താരം കേരളത്തിന്റെ സ്വന്തം കൊച്ചിയിൽ വന്ന് കേരളാ ബ്ലാസ്റ്റേഴ്സിനെതിരെ പന്ത് തട്ടിയിട്ടുണ്ട്!
കേട്ടപ്പോൾ അത്ഭുതം തോന്നുന്നുണ്ടോ? ആ താരം വേറാരുമല്ല, സ്പെയിനിന്റെ വിശ്വസ്തനായ റൈറ്റ് ബാക്ക് പെഡ്രോ പൊറോയാണ്. ഇന്ന് ലോകത്തിന്റെ ഉച്ചിയിൽ നിൽക്കുന്ന ഈ സ്പാനിഷ് താരം എട്ട് വർഷങ്ങൾക്ക് മുൻപ് കൊച്ചിയുടെ മണ്ണിൽ ബ്ലാസ്റ്റേഴ്സിന്റെ വല കുലുക്കിയിട്ടുണ്ട് എന്നത് ഒരുപക്ഷേ പല ആരാധകരും മറന്നുപോയ ഒരു കഥയായിരിക്കും.
സംഭവം നടക്കുന്നത് 2018-ലാണ്. ഇന്ത്യയിലെ പ്രഥമ രാജ്യാന്തര പ്രീ-സീസൺ ഫുട്ബോൾ ടൂർണമെന്റായ ‘ടൊയോട്ട യാരിസ് ലാ ലിഗ വേൾഡ്’ കൊച്ചിയിൽ അരങ്ങേറിയ സമയം.
കേരളാ ബ്ലാസ്റ്റേഴ്സിന് പുറമെ ഓസ്ട്രേലിയൻ ക്ലബ്ബായ മെൽബൺ സിറ്റി എഫ്.സിയും സ്പാനിഷ് കരുത്തരായ ജിറോണ എഫ്.സിയുമായിരുന്നു ടൂർണമെന്റിലെ മാറ്റുരച്ച മറ്റ് ടീമുകൾ.
അന്ന് ജൂലൈ 28-ന് നടന്ന ബ്ലാസ്റ്റേഴ്സ് – ജിറോണ പോരാട്ടത്തിൽ ജിറോണയുടെ സ്റ്റാർട്ടിംഗ് ഇലവനിൽ തന്നെ പെഡ്രോ പൊറോ ഉണ്ടായിരുന്നു. മത്സരത്തിന്റെ 54-ാം മിനിറ്റിൽ മഞ്ഞപ്പടയുടെ വലകുലുക്കി താരം തന്റെ സാന്നിധ്യം അറിയിക്കുകയും ചെയ്തു.
അന്ന് എതിരില്ലാത്ത അഞ്ച് ഗോളുകൾക്കായിരുന്നു ബ്ലാസ്റ്റേഴ്സ് പരാജയപ്പെട്ടത്. അന്ന് കൊച്ചിയിൽ വന്ന് ഗോളടിച്ച് മടങ്ങിയ ആ ചെറുപ്പക്കാരനാണ് ഇന്ന് ലോകചാമ്പ്യന്മാരായ സ്പെയിൻ നിരയിലെ നിർണായക ശക്തിയായി മാറിയത്.
എന്നാൽ ബ്ലാസ്റ്റേഴ്സിന് ഇത്തവണത്തെ ലോകകപ്പുമായി ഉള്ള ബന്ധം ഇവിടെയും തീരുന്നില്ല. ടൂർണമെന്റിൽ മത്സരിച്ച ഹെയ്തി ടീമിന് വേണ്ടി മുൻ ബ്ലാസ്റ്റേഴ്സ് താരം ഡക്കൻസ് നാസോണും ബൂട്ട് കെട്ടിയിരുന്നു. ഇന്ത്യൻ സൂപ്പർ ലീഗിൽ (ISL) കളിച്ചതിന് ശേഷം ഒരു താരം ലോകകപ്പിൽ കളിക്കുന്നത് ഐ.എസ്.എൽ ചരിത്രത്തിൽ തന്നെ ആദ്യമായിട്ടായിരുന്നു. മഞ്ഞപ്പടയുടെ കളത്തിലുണ്ടായിരുന്നവർ ലോക ഫുട്ബോളിന്റെ വലിയ വേദിയിൽ തിളങ്ങുന്നത് കാണുമ്പോൾ ഏതൊരു ബ്ലാസ്റ്റേഴ്സ് ആരാധകനും അതൊരു പ്രത്യേക സന്തോഷവും അഭിമാനവും തന്നെയാണ്.
ALSO READ:
- സച്ചിൻ സുരേഷും കേരളാ ബ്ലാസ്റ്റേഴ്സ് വിട്ടു: ക്ലബ് വിടുന്ന മൂന്നാമത്തെ മലയാളി താരം
- ബ്ലാസ്റ്റേഴ്സിനെ രക്ഷിക്കാൻ ജർമൻ ക്ലബെത്തുന്നു: പുതിയ ഉടമകളാവുമോ?
- വീണ്ടും പടിയിറക്കം: നിഹാലും കെവിൻ യോക്കും ബ്ലാസ്റ്റേഴ്സ് വിട്ടു
English Summary: Spanish right back Pedro Porro, who recently won the World Cup with Spain, once scored against Pedro Porro Kerala Blasters during the 2018 LaLiga World tournament in Kochi. Additionally, former Blasters forward Duckens Nazon represented Haiti, making ISL history at the World Cup.