സൂപ്പർ കപ്പ് പോരാട്ടങ്ങൾക്ക് ഏപ്രിൽ 20 ന് തുടക്കമാവുകയാണ്. പ്രതീക്ഷകളുമായി വീണ്ടും ബ്ലാസ്റ്റേഴ്‌സ് ഇറങ്ങുന്നുണ്ട്. സൂപ്പർ കപ്പ് പോരാട്ടത്തിന് ഇനി മണിക്കൂറുകൾ ബാക്കി നിൽക്കെ കേരളാ ബ്ലാസ്റ്റേഴ്സിന്റെ മത്സരത്തിൽ മാറ്റം വരുത്തിയിരിക്കുകയാണ് ടൂർണമെന്റ് സംഘാടകരായ എഐഎഫ്എഫ്.
ഏപ്രിൽ 20 വൈകുന്നേരം 4:30 നായിരുന്നു ഉദ്‌ഘാടന മത്സരമായ കേരളാ ബ്ലാസ്റ്റേഴ്‌സ്- ഈസ്റ്റ് ബംഗാൾ മത്സരം ആദ്യം ഷെഡ്യൂൾ ചെയ്തിരുന്നത്. എന്നാൽ ഈ മത്സരം അന്നേ ദിവസം രാത്രി 8 മണിയിലേക്ക് മാറ്റിയിരിക്കുകയാണ് എഐഎഫ്എഫ്.
ഏപ്രിൽ 20 ന് രാത്രി 8 മണിക്ക് മോഹൻ ബഗാനും ചർച്ചിൽ ബ്രദേഴ്സ് ഗോവയും തമ്മിലുള്ള മത്സരമായിരുന്നു നേരത്തെ ഷെഡ്യൂൾ ചെയ്തിരുന്നത്. എന്നാൽ ഐ- ലീഗിലെ കിരീടവകാശികളെ സംബന്ധിച്ച് തർക്കം തുടരുന്ന സാഹചര്യത്തിൽ ചർച്ചിൽ ബ്രദേഴ്സ് സൂപ്പർ കപിൽ നിന്നും പ്രതിഷേധം എന്നോണം പിൻമാറിയിരുന്നു.
ചർച്ചിൽ പിന്മാറിയതോടെ മോഹൻ ബഗാന് ആദ്യ റൌണ്ട് മത്സരം കളിക്കാതെ ക്വാർട്ടർ ഫൈനലിലേക്ക് നേരിട്ട് പ്രവേശനം ലഭിക്കുകയും ചെയ്‌തു. ഈ മത്സരം ഉപേക്ഷിച്ചതാണ് ബ്ലാസ്റ്റേഴ്സിന്റെ മത്സരം രാത്രി 8 മണിയിലേക്ക് മാറ്റിയത്.
അതേ സമയം, സൂപ്പർ കപ്പ് ഒരുക്കത്തിനിടെ ബ്ലാസ്റ്റേഴ്‌സ് ക്യാമ്പിൽ രണ്ട് താരങ്ങൾക്ക് പരിക്കാണെന്ന റിപ്പോർട്ട് പുറത്ത് വന്നിരുന്നു. ഗോൾ കീപ്പർമാരായ സച്ചിൻ സുരേഷ്, നോറ ഫെർണാണ്ടസ് എന്നിവർക്കാണ് പരിക്കേറ്റത് എന്നാണ് റിപോർട്ടുകൾ. എന്നാൽ ഇരുവരും സൂപ്പർ കപ്പ് സ്‌ക്വാഡിലുണ്ട്.