ലോക ക്രിക്കറ്റിലെ എക്കാലത്തെയും മികച്ച നായകന്മാരിലൊരാളായ എം.എസ്. ധോണി ഇന്ന് 44-ാം ജന്മദിനം ആഘോഷിക്കുകയാണ്. അന്താരാഷ്ട്ര കരിയറിനോട് വിട പറഞ്ഞ് 6 വർഷങ്ങൾ പിന്നിടുമ്പോൾ അദ്ദേഹത്തിന് മാത്രം സ്വന്തമായുള്ള ഒരു റെക്കോർഡ് കൂടിയുണ്ട്. ഒരുപക്ഷേ ആധുനിക ക്രിക്കറ്റിൽ മറ്റാർക്കും ഭേദിക്കാൻ കഴിയാത്ത ഒന്ന് കൂടിയാണിത്. ഐസിസിയുടെ മൂന്ന് പ്രധാന ടൂർണമെൻ്റ് കിരീടങ്ങളും നേടിയ ഏക നായകൻ എന്ന അപൂർവ്വ ബഹുമതി മഹേന്ദ്ര സിംഗ് ധോണിക്ക് മാത്രം സ്വന്തം.
2007-ൽ ദക്ഷിണാഫ്രിക്കയിൽ നടന്ന പ്രഥമ ഐസിസി ടി20 ലോകകപ്പിലാണ് ധോണി തൻ്റെ നായകമികവ് ആദ്യം തെളിയിച്ചത്. യുവനിരയുമായി അപ്രതീക്ഷിതമായി എത്തിയ ധോണി, കരുത്തരായ ടീമുകളെ മലർത്തിയടിച്ച് ഇന്ത്യക്ക് ലോകകപ്പ് നേടിക്കൊടുത്തു. ഇത് ഇന്ത്യൻ ക്രിക്കറ്റിൽ ഒരു പുതിയ യുഗത്തിന് തുടക്കം കുറിച്ചു.
പിന്നീട് 2011-ൽ സ്വന്തം നാട്ടിൽ നടന്ന ഏകദിന ലോകകപ്പിൽ, 28 വർഷത്തെ കാത്തിരിപ്പിന് വിരാമമിട്ട് ധോണിയുടെ നേതൃത്വത്തിൽ ഇന്ത്യ കിരീടം ചൂടി. ഫൈനലിൽ ശ്രീലങ്കയ്‌ക്കെതിരെ നേടിയ വിജയറൺ, ഓരോ ഇന്ത്യൻ ആരാധകൻ്റെയും മനസ്സിൽ ഇന്നും മായാതെ നിൽക്കുന്നു.
2013-ൽ ഇംഗ്ലണ്ടിൽ നടന്ന ഐസിസി ചാമ്പ്യൻസ് ട്രോഫി കൂടി ഇന്ത്യക്ക് സമ്മാനിച്ചതോടെയാണ് ധോണി ഈ സ്വപ്ന നേട്ടം പൂർത്തിയാക്കിയത്. മഴ തടസ്സപ്പെടുത്തിയ ഫൈനലിൽ ഇംഗ്ലണ്ടിനെ കീഴടക്കി ഇന്ത്യ കിരീടമുയർത്തി.
ഈ മൂന്ന് ഐസിസി കിരീടങ്ങളും നേടിയ ലോകത്തിലെ ഏക ക്യാപ്റ്റൻ എന്ന ധോണിയുടെ റെക്കോർഡ്, അദ്ദേഹത്തിന്റെ നായകത്വ മികവിനും സമ്മർദ്ദഘട്ടങ്ങളിൽ ടീമിനെ വിജയത്തിലേക്ക് നയിക്കാനുള്ള കഴിവിനും അടിവരയിടുന്നു. തൻ്റെ 44-ാം ജന്മദിനം ആഘോഷിക്കുമ്പോൾ, ധോണി ഇന്ത്യൻ ക്രിക്കറ്റ് ചരിത്രത്തിലെ ഒരു ഇതിഹാസ നായകനായി ഇന്നും നിലകൊള്ളുന്നു.