അയർലൻഡിനെതിരായ ആദ്യ ടി20 മത്സരത്തിൽ ആരാധകർ ഏറെ ആകാംക്ഷയോടെ കാത്തിരുന്ന 15-കാരൻ വൈഭവ് സൂര്യവംശിയുടെ അരങ്ങേറ്റം നീണ്ടുപോകും. ബെൽഫാസ്റ്റിൽ നടന്ന മത്സരത്തിൽ താരം ആദ്യ ഇലവനിൽ ഇടംപിടിക്കാത്തതിന്റെ കാരണങ്ങളെക്കുറിച്ചറിയാം..
ALSO READ:
- അവൻ ഭാവിയിൽ ആർസിബിയുടെ ക്യാപ്റ്റനാവും: യുവതാരത്തെ കുറിച്ച് ടീം ഡയറ്കടർ
- സൂര്യയും ഹാർദിക്കും മുംബൈ വിടുന്നു; സിഎസ്കെ, കെകെആർ, രാജസ്ഥാൻ എന്നിവരുടെ ചരട് വലികൾ ശക്തം
- ശ്രേയസ് അയ്യർ താൽക്കാലിക ക്യാപ്റ്റൻ മാത്രം; കസേര ലക്ഷ്യമിട്ട് ശുഭ്മൻ ഗിൽ തിരിച്ചെത്തുന്നു? ഞെട്ടിക്കുന്ന റിപ്പോർട്ട് പുറത്ത്!
റെക്കോർഡ് തിരുത്താൻ വൈഭവ്; തടസ്സമായി ശക്തമായ ബാറ്റിങ് നിര
ഇന്ന് പ്ലേയിംഗ് ഇലവനിൽ കളിച്ചിരുന്നെങ്കിൽ ഇന്ത്യൻ ക്രിക്കറ്റ് ചരിത്രത്തിൽ അരങ്ങേറ്റം കുറിക്കുന്ന ഏറ്റവും പ്രായം കുറഞ്ഞ താരമെന്ന റെക്കോർഡ് വൈഭവ് സൂര്യവംശിക്ക് സ്വന്തമാകുമായിരുന്നു.
നിലവിൽ വനിതാ ടീമിൽ ഷഫാലി വർമ്മയും പുരുഷ ടീമിൽ സച്ചിൻ ടെൻഡുക്കൽക്കറുമാണ് ഈ റെക്കോർഡ് കൈയാളുന്നത്.
ബെൽഫാസ്റ്റിൽ അയർലൻഡിനെതിരെ ടോസ് ജയിച്ച് ഇന്ത്യ ബൗളിങ് തിരഞ്ഞെടുത്തതിന് പിന്നാലെയാണ് വൈഭവ് കളിക്കുന്നില്ലെന്ന വിവരം നായകൻ ശ്രേയസ് അയ്യർ വ്യക്തമാക്കിയത്.
അഭിഷേക് ശർമ്മ, സഞ്ജു സാംസൺ, ഇഷാൻ കിഷൻ എന്നിവരടങ്ങുന്ന ഇന്ത്യൻ ടീമിന്റെ അതിശക്തമായ ടോപ്പ് ഓർഡർ നിര നിലവിലുള്ളപ്പോൾ അവരിൽ ഒരാളെ മാറ്റിനിർത്തി വൈഭവിനെ ഉൾപ്പെടുത്തുക എന്നത് ടീം മാനേജ്മെന്റിന് വലിയൊരു റിസ്ക് ആയിരുന്നു.
ശരിയായ സമയത്ത് അവസരം വരുമെന്ന് നായകൻ
വൈഭവ് മികച്ച കളിക്കാരനാണെന്നതിൽ തർക്കമില്ലെന്നും എന്നാൽ ഇതിനകം ടീമിനായി മികച്ച പ്രകടനം പുറത്തെടുത്തവർക്ക് പിന്തുണ നൽകാനാണ് തീരുമാനിച്ചതെന്നും ടോസ് സമയത്ത് ശ്രേയസ് അയ്യർ പറഞ്ഞു.
ശരിയായ സമയം വരുമ്പോൾ വൈഭവിന് തീർച്ചയായും അവസരം ലഭിക്കുമെന്നും ശ്രേയസ് വ്യക്തമാക്കി.
റൺസ് അടിച്ചുകൂട്ടുന്ന ഒരു താരത്തെ ടീമിൽ നിന്ന് ഒഴിവാക്കി മറ്റൊരാൾക്ക് അവസരം നൽകുന്നത് അനീതിയാകുമെന്ന് ബാറ്റിംഗ് കോച്ച് സിതാൻഷു കോട്ടകും മുൻപ് പ്രതികരിച്ചിരുന്നു. ഇന്ത്യൻ ക്രിക്കറ്റിലെ പ്രതിഭകളുടെ അതിപ്രസരം ടീം തിരഞ്ഞെടുപ്പ് കടുത്ത തലവേദനയാക്കുന്നുണ്ടെന്നും അദ്ദേഹം തമാശയായി കൂട്ടിച്ചേർത്തു.
പരിശീലനത്തിനിടെ മുഖ്യ പരിശീലകൻ ഗൗതം ഗംഭീറുമായി വൈഭവ് ദീർഘനേരം സംസാരിച്ചിരുന്നു.
ആദ്യ മത്സരത്തിൽ വൈഭവിന്റെ അരങ്ങേറ്റം കാണാനാകാതെ ആരാധകർ നിരാശരായെങ്കിലും ഞായറാഴ്ച നടക്കുന്ന പരമ്പരയിലെ രണ്ടാം മത്സരത്തിലെങ്കിലും ഈ പതിനഞ്ചുകാരന് അവസരം ലഭിക്കുമെന്ന പ്രതീക്ഷയിലാണ് ക്രിക്കറ്റ് ലോകം.
English Summary: The highly anticipated Vaibhav Suryavanshi India Debut was delayed after the 15 year old prodigy was left out of the playing XI for the first T20I against Ireland. Captain Shreyas Iyer explained that a stacked top-order required backing existing performers, but promised the youngster’s time would come soon.