രണ്ട് ബ്ലാസ്റ്റേഴ്‌സ് താരങ്ങൾക്ക് പരിക്ക്; സീസൺ നഷ്ടമായേക്കും; വമ്പൻ തിരിച്ചടി

ലീഗിലെ മൂന്നാം മത്സരത്തിൽ മുംബൈ സിറ്റിയോട് പരാജയപ്പെട്ടതിന് പിന്നാലെ കേരളാ ബ്ലാസ്റ്റേഴ്‌സിന് മറ്റൊരു വമ്പൻ തിരിച്ചടി. രണ്ട് ബ്ലാസ്റ്റേഴ്‌സ് താരങ്ങൾക്കേറ്റ ഗുരുതര പരിക്ക് തന്നെയാണ് ബ്ലാസ്റ്റേഴ്‌സിന് തിരിച്ചടിയായിരിക്കുന്നത്.

പ്രതിരോധ താരം ഐബാൻ ഡോഹ്ലിങാണ് പരിക്കേറ്റവരിൽ ഒരാൾ. മുംബൈയ്ക്കെതിരായ മത്സരത്തിൽ കാൽമുട്ടിന് പരിക്കേറ്റ താരത്തിന് ദീർഘകാലം പുറത്തിരിക്കേണ്ടി വരുമെന്നാണ് റിപ്പോർട്ടുകൾ. താരത്തിന് സീസൺ നഷ്ടമാവാനുള്ള സാധ്യതകളും ചില മാധ്യമങ്ങൾ റിപ്പോർട്ട്‌ ചെയ്യുന്നു.

മധ്യനിര താരം ജീക്സൺ സിങാണ് പരിക്കേറ്റ മറ്റൊരു താരം. എന്നാൽ ജീക്സന്റെ പരിക്കിനെ പറ്റിയുള്ള കൂടുതൽ വിവരങ്ങൾ ലഭ്യമല്ല. താരത്തിന് പരിക്കേറ്റതായി സ്ഥിരീകരിക്കുന്നുണ്ടെങ്കിലും താരത്തിന് എത്ര മത്സരം നഷ്ടമാവുമെന്ന് വ്യക്തമല്ല.

ബ്ലാസ്റ്റേഴ്സിന്റെ രണ്ടു സുപ്രധാന താരങ്ങൾക്കാണ് പരിക്കേറ്റത് എന്നതിനാൽ ബ്ലാസ്റ്റേഴ്സിന് ഇത് വലിയ തിരിച്ചടിയാകും. ഇരുവരും കഴിഞ്ഞ മൂന്നു മത്സരങ്ങളിലും ബ്ലാസ്റ്റേഴ്സിന്റെ ആദ്യ ഇലവനിൽ ഉണ്ടായിരുന്ന താരങ്ങളാണ്.