അഞ്ച് വർഷത്തെ നീണ്ട സേവനത്തിനൊടുവിൽ കേരള ബ്ലാസ്റ്റേഴ്സിന്റെ സ്പോർട്ടിങ് ഡയറക്ടർ കരോലിസ് സ്കിങ്കിസ് ക്ലബ്ബുമായുള്ള ബന്ധം അവസാനിച്ചു.
ALSO READ:
- ബ്ലാസ്റ്റേഴ്സിനെ വിറ്റഴിക്കാക്കാൻ മാഗ്നം: ഇടനിലക്കാരൻ അഭിക് ചാറ്റർജി
- ഇത്തവണ ഐഎസ്എല്ലിന് ‘ഗുമ്മുണ്ടാവില്ല’: കാരണം എഐഎഫ്എഫിന്റെ 2 നിയമങ്ങൾ
- ബ്ലാസ്റ്റേഴ്സിനോട് താൽപര്യമില്ല: ആഷ്ലിയുടെ കണ്ണ് മറ്റു ക്ലബ്ബുകളിലേക്ക്
കരോലിസിന്റെ വിടപറച്ചിൽ
തന്റെ ഔദ്യോഗിക ഇൻസ്റ്റഗ്രാം പേജിലൂടെയാണ് കരോലിസ് സ്കിങ്കിസ് ബ്ലാസ്റ്റേഴ്സ് വിടുന്ന കാര്യം ആരാധകരെ അറിയിച്ചത്. 2023-ൽ ക്ലബ്ബുമായി അഞ്ച് വർഷത്തെ പുതിയ കരാർ ഒപ്പിട്ടിരുന്നെങ്കിലും കാലാവധി പൂർത്തിയാകും മുൻപാണ് അദ്ദേഹത്തിന്റെ ഈ നാടകീയമായ പിന്മാറ്റം.
ബ്ലാസ്റ്റേഴ്സിന്റെ ചരിത്രത്തിൽ ഏറ്റവും കൂടുതൽ സ്വാധീനം ചെലുത്തിയ ഒരു പ്രധാന പദവിയിൽ നിന്നാണ് അദ്ദേഹം ഇപ്പോൾ പടിയിറങ്ങുന്നത്.
ബ്ലാസ്റ്റേഴ്സിനെ മാറ്റിയെഴുതിയ അഞ്ച് വർഷങ്ങൾ
തുടർച്ചയായ മൂന്ന് സീസണുകളിൽ പ്ലേ ഓഫ് കാണാതെ നിരാശപ്പെടുത്തിയ ബ്ലാസ്റ്റേഴ്സിനെ അടിമുടി മാറ്റാനാണ് 2020 മാർച്ചിൽ ലിത്വാനിയൻ ഫുട്ബോൾ എക്സിക്യൂട്ടീവായ കരോലിസ് സ്കിങ്കിസിനെ മാനേജ്മെന്റ് ക്ലബ്ബിന്റെ ആദ്യ സ്പോർട്ടിങ് ഡയറക്ടറായി നിയമിക്കുന്നത്.
ടീമിൽ പ്രൊഫഷണലിസം കൊണ്ടുവരുന്നതിൽ അദ്ദേഹം നിർണായക പങ്ക് വഹിച്ചു. ക്ലബ്ബിന്റെ ചരിത്രത്തിലാദ്യമായി ഫിറ്റ്നസ് കോച്ചിനെയും ടാക്റ്റിക്കൽ അനലിസ്റ്റിനെയും നിയമിച്ചത് അദ്ദേഹത്തിന്റെ നേതൃത്വത്തിലായിരുന്നു.
ആദ്യ സീസണിൽ ടീം പത്താം സ്ഥാനത്താണ് ഫിനിഷ് ചെയ്തതെങ്കിലും പിന്നീട് ബ്ലാസ്റ്റേഴ്സിന്റെ ചരിത്രത്തിലെ ഏറ്റവും സുവർണ്ണ കാലഘട്ടത്തിനാണ് കരോലിസ് തുടക്കമിട്ടത്.
2021-ൽ കോച്ച് ഇവാൻ വുകോമനോവിച്ചിനെ ക്ലബ്ബിലേക്ക് എത്തിച്ചത് കരോലിസിന്റെ ഏറ്റവും മികച്ച തീരുമാനങ്ങളിൽ ഒന്നായിരുന്നു. ഇവാനും കരോലിസും ഒത്തുചേർന്നതോടെ ബ്ലാസ്റ്റേഴ്സ് ഐഎസ്എൽ ഫൈനലിൽ വരെയെത്തി. ചരിത്രത്തിലാദ്യമായി തുടർച്ചയായ സീസണുകളിൽ പ്ലേ ഓഫിലേക്ക് യോഗ്യത നേടാനും ഏറ്റവും കൂടുതൽ വിജയങ്ങൾ സ്വന്തമാക്കാനും ക്ലബ്ബിന് സാധിച്ചു.
കരോലിസിന്റെ തന്ത്രങ്ങളും താരങ്ങളും
പരിമിതമായ ബജറ്റിലും മികച്ച വിദേശ താരങ്ങളെയും യുവ ഇന്ത്യൻ പ്രതിഭകളെയും ടീമിലെത്തിക്കാൻ കരോലിസിന് പ്രത്യേക കഴിവുണ്ടായിരുന്നു. ഗാരി ഹൂപ്പർ, വിസെന്റെ ഗോമസ്, അഡ്രിയാൻ ലൂണ തുടങ്ങിയ പ്രമുഖ വിദേശ താരങ്ങളെ ബ്ലാസ്റ്റേഴ്സിലേക്ക് കൊണ്ടുവന്നത് അദ്ദേഹമാണ്.
അതോടൊപ്പം നിഷു കുമാർ, പ്രഭ്സുഖൻ ഗിൽ, പുയ്ട്ടിയ തുടങ്ങിയ മികച്ച യുവതാരങ്ങളെ ദീർഘകാല കരാറിൽ ടീമിലെത്തിച്ച് ക്ലബ്ബിന്റെ ഭാവി സുരക്ഷിതമാക്കാനും അദ്ദേഹം ശ്രദ്ധിച്ചു.
ലിത്വാനിയൻ ക്ലബ്ബായ എഫ്കെ സുദുവയെ തുടർച്ചയായ വിജയങ്ങളിലേക്ക് നയിച്ച പരിചയസമ്പത്തുമായാണ് കരോലിസ് കൊച്ചിയിലെത്തിയത്. ബ്ലാസ്റ്റേഴ്സിനെ ഒരു കളിസംഘം എന്നതിലുപരി മികച്ചൊരു പ്രൊഫഷണൽ ടീമാക്കി മാറ്റാൻ അദ്ദേഹത്തിന് സാധിച്ചെങ്കിലും, ഒരു തവണ പോലും കിരീടം നേടിക്കൊടുക്കാൻ കഴിയാത്തത് ഒരു വലിയ കുറവായി അവശേഷിക്കുന്നു.
English Summary: In a major development, Sporting Director Karolis Skinkys leaves Kerala Blasters after a transformative five year tenure. The Lithuanian executive announced his departure via Instagram, leaving the ISL club ahead of the upcoming season to look for a new structural overhaul.