ഇന്ത്യൻ ടി20 ടീമിന്റെ പുതിയ നായകത്വവുമായി ബന്ധപ്പെട്ട് പല തരത്തിലുള്ള ചർച്ചകളും റിപ്പോർട്ടുകളുമാണ് അടുത്തിടെയായി പുറത്തുവന്നു കൊണ്ടിരിക്കുന്നത്.
നിലവിലെ നായകൻ സൂര്യകുമാർ യാദവിനെ ഈ നിർണായക റോളിൽ നിന്നും വൈകാതെ തന്നെ മാറ്റുമെന്നാണ് സൂചനകൾ. പകരം വരാനിരിക്കുന്ന അടുത്ത ലോകകപ്പും ഒളിംപിക്സും മുന്നിൽ കണ്ട് ദീർഘകാലത്തേക്ക് ഒരു പുതിയ നായകനെ കൊണ്ടുവരാനാണ് ബിസിസിഐ ശ്രമിക്കുന്നത്. ദേശീയ മാധ്യമങ്ങളെല്ലാം ഈ വാർത്ത വലിയ രീതിയിൽ റിപ്പോർട്ട് ചെയ്യുന്നുമുണ്ട്.
പഞ്ചാബ് കിങ്സ് നായകൻ ശ്രേയസ് അയ്യർ ഉൾപ്പെടെയുള്ള പ്രമുഖരുടെ പേരുകൾ തുടക്കത്തിൽ ഈ സ്ഥാനത്തേക്ക് ഉയർന്നു വന്നിരുന്നു. എന്നാൽ ഇപ്പോൾ കായിക പ്രേമികളെയും മലയാളി ആരാധകരെയും ഒരേപോലെ ആവേശത്തിലാഴ്ത്തുന്ന ഒരു പുതിയ വാർത്ത കൂടി പുറത്ത് വരികയാണ്.
മലയാളി താരം സഞ്ജു സാംസൺ (Sanju Samson) ഇന്ത്യയുടെ പുതിയ നായകനായി ചുമതലയേൽക്കാൻ സാധ്യതയുണ്ടെന്നാണ് പുതിയ റിപ്പോർട്ടുകൾ വ്യക്തമാക്കുന്നത്.
പ്രമുഖ സ്പോർട്സ് എഡിറ്ററും മുൻപ് ഇന്ത്യൻ എക്സ്പ്രസ് ഉൾപ്പെടെയുള്ള ദേശീയ മാധ്യമങ്ങളിൽ പ്രവർത്തിച്ച് പരിചയവുമുള്ള ജിഎസ് വിവേകിന്റെ ഒരു പുതിയ റിപ്പോർട്ടിലാണ് ഇക്കാര്യം പ്രതിപാദിക്കുന്നത്.
മുൻപും ഇന്ത്യൻ ക്രിക്കറ്റിലെ പല നിർണായക വിവരങ്ങളും കൃത്യമായി പുറത്തുവിട്ടിട്ടുള്ള വ്യക്തിയാണ് ജിഎസ് വിവേക് എന്നതിനാൽ ഈ റിപ്പോർട്ട് കേവലം റൂമറുകൾ മാത്രമല്ല.
ഇന്ത്യൻ ക്രിക്കറ്റിലെ ചില പ്രധാന പുരോഗതികൾ എന്ന തലക്കെട്ടോടു കൂടി അദ്ദേഹം പങ്കുവെച്ച കുറിപ്പിലാണ് സഞ്ജു സാംസൺ ഇന്ത്യയുടെ പുതിയ ടി20 ക്യാപ്റ്റനായി വരുമെന്ന് വ്യക്തമായി ചൂണ്ടിക്കാണിച്ചിരിക്കുന്നത്.
വരും വർഷങ്ങളിൽ ഇന്ത്യൻ ക്രിക്കറ്റിനെ നയിക്കാൻ പോകുന്ന പ്രധാന ശക്തിയായി സഞ്ജു മാറുമെന്നാണ് ഈ റിപ്പോർട്ടിൽ നൽകുന്ന സൂചന.
വരാനിരിക്കുന്ന ടി-20 മത്സരങ്ങളുടെ വലിയൊരു കാലയളവിൽ ഇന്ത്യയെ നയിക്കാൻ പോകുന്നത് സഞ്ജുവായിരിക്കുമെന്നാണ് റിപ്പോർട്ട്. 2028-ൽ നടക്കാനിരിക്കുന്ന ടി20 ലോകകപ്പ്, ഒളിംപിക്സ് എന്നിവയിൽ ഈ മലയാളി താരത്തിന് കീഴിലായിരിക്കും ഇന്ത്യൻ ടീം അണിനിരക്കുകയെന്നും റിപ്പോർട്ടിൽ പ്രതിപാദിക്കുന്നു.
എന്നാൽ നിലവിലെ നായകൻ സൂര്യകുമാർ യാദവിനെ നായകസ്ഥാനത്തു നിന്നും പെട്ടെന്ന് ഒരു ദിവസം മാറ്റാൻ സാധ്യതയില്ലെന്നും റിപ്പോർട്ടിൽ സൂചിപ്പിക്കുന്നു.
വരാനിരിക്കുന്ന ജൂൺ, ജൂലൈ മാസങ്ങളിലായി നടക്കാനിരിക്കുന്ന അയർലാൻഡ്, ഇംഗ്ലണ്ട് പര്യടനങ്ങളിൽ സൂര്യകുമാർ യാദവിന് കീഴിൽ തന്നെയായിരിക്കും ഇന്ത്യ കളിക്കാൻ ഇറങ്ങുക. അതിനുശേഷമായിരിക്കും ടീമിന്റെ നായകസ്ഥാനത്ത് വലിയൊരു അഴിച്ചുപണി പ്രതീക്ഷിക്കുന്നത്.
ALSO READ: ഹർദിക്കിനെ വിറ്റ് ആ ഓസിസ് താരത്തെ കൊണ്ട് വരൂ: മുംബൈയ്ക്ക് സർപ്രൈസ് നിർദേശവുമായി മുൻ ക്യാപ്റ്റൻ
മറ്റു റിപ്പോർട്ടുകൾ
സഞ്ജുവിന്റെ കാര്യം മാത്രമല്ല, മറ്റു പല കാര്യങ്ങളും ഈ റിപ്പോർട്ടിൽ പ്രതിപാദിക്കുന്നുണ്ട്. അടുത്ത വർഷം നടക്കാനിരിക്കുന്ന ഐസിസി ഏകദിന ലോകകപ്പിൽ മുൻ ക്യാപ്റ്റനും വെറ്ററൻ ഇതിഹാസ ഓപ്പണറുമായ രോഹിത് ശർമ കളിക്കാനിടയില്ലെന്നാണ് മറ്റൊരു കാര്യം.
വരാനിരിക്കുന്ന ഇംഗ്ലണ്ട് പര്യടനം രോഹിത്തിന്റെ കരിയറിനെ സംബന്ധിച്ച് ഏറെ നിർണായകമായിരിക്കും. ഏകദിന മത്സരങ്ങളിൽ രോഹത്തിന്റെ ബാക്കപ്പുകളായി യശസ്വി ജയ്സ്വാളിനൊപ്പം ഇഷാൻ കിഷൻ, റുതുരാജ് ഗെയ്ക്വാദ് എന്നിവരെയും നിലവിൽ പരിഗണിക്കുന്നുണ്ട്.
ടെസ്റ്റ്, ഏകദിന ടീമുകളിൽ കൂടുതൽ സന്തുലിതാവസ്ഥ കൊണ്ടുവരുന്നതിന് വേണ്ടി വാഷിങ്ടൺ സുന്ദറിനെയും നിതീഷ് കുമാർ റെഡ്ഡിയെയും വരും മത്സരങ്ങളിൽ കൂടുതൽ ഉപയോഗിക്കാനും പ്ലാനുകളുള്ളതായാണ് ഈ റിപ്പോർട്ടിൽ സൂചിപ്പിക്കുന്നത്.
സൗത്താഫ്രിക്കയിലും ഓസ്ട്രേലിയയിലുമെല്ലാം നടക്കാനിരിക്കുന്ന അടുത്ത ലോകകപ്പുകൾ മുന്നിൽ കണ്ട് കൂടുതൽ ബൗൺസും സീമും സൃഷ്ടിക്കാൻ സാധിക്കുന്ന ഫാസ്റ്റ് ബൗളർമാരെയാണ് ബിസിസിഐ ഇപ്പോൾ പ്രധാനമായും നോട്ടമിടുന്നത്.
ALSO READ: ആ 2 പേരും അടുത്ത ലോകകപ്പ് കളിക്കില്ല: ഗംഭീറിന്റെ കടുത്ത സൂചന
സഞ്ജുവിന് പിന്തുണ
ടീമിന്റെ മുഖ്യ പരിശീലകൻ ഗൗതം ഗംഭീർ, നിലവിലെ ക്യാപ്റ്റൻ സൂര്യകുമാർ യാദവ് എന്നിവരുടെയെല്ലാം വലിയ പിന്തുണയും സഞ്ജുവിന് ലഭിക്കുന്നുണ്ട്.
പ്രതിഭയുള്ള കളിക്കാർക്ക് കൂടുതൽ അവസരങ്ങൾ നൽകണം എന്ന നിലപാടുകാരനാണ് പരിശീലകൻ ഗൗതം ഗംഭീർ. അതുകൊണ്ട് തന്നെ സഞ്ജുവിനെ പോലൊരു പരിചയസമ്പന്നനായ കളിക്കാരനെ ക്യാപ്റ്റൻ സ്ഥാനത്തേക്ക് കൊണ്ടുവരുന്നതിൽ മാനേജ്മെന്റിനും വലിയ താല്പര്യമുണ്ട്. എന്തായാലും വരും മാസങ്ങളിൽ ഇന്ത്യൻ ക്രിക്കറ്റിൽ വലിയ മാറ്റങ്ങളാണ് സംഭവിക്കാൻ പോകുന്നത് എന്ന് ഉറപ്പാണ്.
ALSO READ: ആഗ്രഹിച്ച വാർത്ത: CSK- യിൽ രണ്ട് കസേരകൾ തെറിക്കുന്നു; അടുത്ത സീസൺ ലക്ഷ്യമാക്കി വൻ അഴിച്ച് പണികൾ
English Summary : Reports suggest Sanju Samson might become India’s new T20 captain, aiming for the 2028 World Cup and Olympics. Following his brilliant performance in the recent World Cup, Samson is highly considered for this top leadership role.