കേരളാ ബ്ലാസ്റ്റേഴ്സ് ആരാധകർ ഏറെ കാത്തിരിക്കുന്ന ട്രാൻസ്ഫർ വാർത്തകൾ ഇപ്പോഴും എത്തിയിട്ടില്ല. ഇതിന് പിന്നിൽ ഇന്ത്യൻ ഫുട്ബോളിലെ അനിശ്ചിതത്വമാണ് പ്രധാന കാരണം. അതിനാൽ കേരളാ ബ്ലാസ്റ്റേഴ്സ് ഉൾപ്പെടെയുള്ള പല ഐഎസ്എൽ ക്ലബ്ബുകളും പുതിയ സൈനിംഗുകൾ താൽക്കാലികമായി നിർത്തിവച്ചിരിക്കുകയാണ്.
എഐഎഫ്എഫ് ക്ലബ്ബുകളെ അറിയിച്ചതനുസരിച്ച്, ഐഎസ്എൽ സീസൺ നടക്കും. എന്നാൽ ഇത്തവണ ഐഎസ്എല്ലിന് മുമ്പ് സൂപ്പർ കപ്പ് നടക്കും. സൂപ്പർ കപ്പിന്റെ തീയതി ഇപ്പോഴും പ്രഖ്യാപിച്ചിട്ടില്ലെങ്കിലും, ഉടൻ പ്രഖ്യാപിക്കുമെന്ന് എഐഎഫ്എഫ് ഉറപ്പു നൽകിയിട്ടുണ്ട്.
സൂപ്പർ കപ്പ് വിജയികൾക്ക് എഎഫ്സി സ്ലോട്ട് ലഭിക്കുന്നതിനാൽ, എല്ലാ ക്ലബ്ബുകളും ഈ ടൂർണമെന്റിനെ ഗൗരവത്തോടെ കാണുന്നു. അതിനാൽ തീയതി പ്രഖ്യാപിക്കാത്ത സാഹചര്യത്തിൽ സൈനിംഗുകൾ പൂർത്തിയാക്കുന്നതിൽ അവർ സൂക്ഷ്മമായ സമീപനമാണ് സ്വീകരിക്കുന്നത്.
കേരളാ ബ്ലാസ്റ്റേഴ്സും ഇതേ നിലപാടാണ് സ്വീകരിക്കുന്നത്. എഐഎഫ്എഫ് സൂപ്പർ കപ്പിന്റെ തീയതി പുറത്തുവിട്ടാൽ മാത്രമേ അവർ സൈനിംഗ് പ്രവർത്തനങ്ങൾ പുനരാരംഭിക്കുകയുള്ളൂ. തീയതി പ്രഖ്യാപനത്തിന് ശേഷം ബ്ലാസ്റ്റേഴ്സ് ട്രാൻസ്ഫർ മാർക്കറ്റിൽ സജീവമാകും.
ബ്ലാസ്റ്റേഴ്സിന്റെ റഡാറിൽ ഇപ്പോഴും ചില പ്രമുഖ താരങ്ങളുണ്ട്. നിഖിൽ പ്രഭു, ഫാറൂഖ് ചൗധരി എന്നിവരെ ടീമിൽ ഉൾപ്പെടുത്താനുള്ള ശ്രമം തുടരുകയാണ്. സൂപ്പർ കപ്പിന്റെ തീയതി പുറത്ത് വന്നാൽ, ആരാധകർ ഏറെ പ്രതീക്ഷയോടെ കാത്തിരിക്കുന്ന ഈ സൈനിംഗുകൾ പൂർത്തിയാകാനുള്ള സാധ്യത കൂടുതലാണ്.